Dili-SMI, VII Governu konstitusionaál liu husi Administrador Postu Vera Cruz Octavio Veira Amaral hala’o enseramentu feira ba loron domin nian (Valentine Day) ne’ebé organiza husi Konsellu Joventude Postu Administrativu Vera Vruz foin lalais ne’e.
Administrador Ocatavio esplika katak maske durante feira mosu provokasaun sira maibe ho apoiu Polisia Nasional Timor Leste – PNTL bele asegura feira la’o ho diak to’o periodu enseramentu.
“Durante feira ne’e iha mós implikasaun ou difikuldade hanesan akontese problema ki’ik, depois halo provokasaun maibe ita nia polisia nasional timor leste eskuarda Vera Cruz sempre atua lalais, maske mosu la sai boot tanba lanu”. Dehan Octavio durante seremonia enseramentu iha Kaikoli, Tersa, (20/02).
Administrador ne’e esplika katak insiativa feira ne’e mai husi Konsellu Joventude husi suku hitu (7) ne’ebé pretense ba Administrador Vera Cruz nian.
Iha fatin seluk, Xefe Suku Kaikoli Hipolito hateten Objetivu husi feira ne,e atu halo animasaun no mós fo oportunidade ba komunidade sira inklui negosiante sir abele faan sira nia produtu.
Lider komunitariu ne’e hatutan katak realizasaun feira ne’e hetan despaisu legál husi Ministériu Komersiu no Industria – MKIA rasik. No, eventu feira ne’e nu’udar feira dahuluk ne’ebé realiza husi Konsellu Joventude Postu Administrativu Vera Cruz nian.
Prezidente Konsellu Juventude Postu Administrador Vera Cruz, Marito Dias katak atividade feira ne’e realiza tanba hetan apoiu husi autoridade lokal, administrador postu no komunidade sira.
Nia dehan tan, feira ne’e hetan partispasaun barak mai husi grupu negosiante, arte kultural, animador muzika, no jogus bola gulin, no promosaun, Telkomsel, Telemor no seluk tan.
Feira hetan fundu husi MKIA, Sekretáriu Estadu Joventude no Traballu, Kompaña Delos, Mary Stopes, Star Printing, Silvia no seluk tan. (Editor, Mateus Barros).
