Dili-SMI, Komandante F-FDTL Maijor General Lere Anan Timur hasoru malu ho Prezidente Repúblika Francisco Guterres Lú Olo hodi diskute kona-ba prespetiva siguransa durante periodu eleisaun antisipada.
“Ami koalia kona-bá preparativus ba seguransa eleisaun antisipada. Prezidente husu dispozitivu, hau dehan katak dispozitivu forsas armadas nian servisu hamutuk ho PNTL sira sei garante siguransa ba eleisaun antisipada ne’ebe sei mai”, dehan Lere Anan Timor ba jornalista sira hafoin remata enkontru ho PR, iha Palasiu Presidensiál Aitarak-Laran, Kuarta, (21/02).
Jenerál fitun rua ne’e mós deklara katak durante enkontru ho prezidente la’os deit koalia kona-ba prespetiva seguransa iha eleisaun antisipada maibe mós koalia kona-ba situasaun atuál liu-liu atetude joventude sira ne’ebé koko atu fahe lider sira.
Durante sorumutu ho prezidente, Lere afirma katak instituisaun F-FDTL – PNTL prontu ona atu asegura eleisaun antisipada. Maibe, nia kontinua komenta sei iha kestaun balun ne’ebé sai nu’udar obstaklu maka asuntu udan boot ne’ebé sei akontese iha fulan maiu, durante periodu eleisaun antisipada.
“Problema mak parte sul, tanba fulan maiu udan loron kalan maibé militar la tau kestaun ba udan maibé kestaun mak kabun mamuk ne’e deit, kuandu kabun bosu ona ne’e nakukun ka udan, mota boot mós tenki ba, so hamlaha ho moras mak obstaklu boot”, dehan Lere.
Relasiona ho seguransa iha eleisaun antisipada maka nia apela ba partidu polítiku sira atu hato’o programa partidu polítika no evita insulta malu durante tempu kampaña eleitorál nian.
“Husu ba lider politiku sira atu halo kampaña tenki tetu no sukat liafuan hodi labele fo impaktu ba eleisaun agora, tamba eleisaun ida ne’e diferente ho eleisaun sira ne’ebe liu ona no husu ba partidus politiku sira sai ema ne’ebe edukadu, sivilizadu hatene koalia sukat ida-idak nia liafuan”, dehan Lere.
Sorumutu entre lider instituisaun militar ho prezidente Repúblika ne’e partisipa mós Vise Komadante Jerál F-FDTL, Brigadeiro Jenerál Filomeno Paixão. (Editor, Lariwa).
