Dili-SMI, Estadu Unidu Amerika – EUA liu husi ninia Embasadora iha Timor-Leste promete sei apoiu totál no respeitu prosesu demokrátiku apoiu Governu iha prosesu Eleisaun Antisipada – EA ne’ebé sei akontese iha fulan maiu, tinan ida ne’e.
Komitementu apoiu ne’e hato’o liu husi Embasadora EUA iha Timor-Leste, Kathleen M. Fitzpatrick hafoin hasoru malu ho Prezidente Repúblika Francisco Guterres Lú Olo iha Palasiu Presidensiál Aitarak-Laran, Tersa, (20/02) hodi koalia kona-ba futuru koperasaun entre rai rua ne’e.
“Sei apoiu totál ba prosesu demokrátiku iha Timor-Leste liga ho eleisaun ba tinan ne’e no sei apoiu tomak ba desizaun hotu ne’ebé mak povu timor sei foti iha eleisaun tuir mai, no sei garante fó suporta iha prosesu demokratiku ne’ebé la’o iha Timor-Leste”, dehan Kathleen.
Kathleen esplika katak durante sorumutu ho PR koalia kona-ba oinsa atu hametin relasaun bilatetal entre nasaun rua iha aspetu hothotu ne’ebé iha relasaun ho serbisu ajensia estadu unidus ne’ebé mak halo ona iha Timor-Leste hodi fó apoiu ba estadu timor hanesan Peace Corps, USAID no Milítar nian.
Embasadora Kathleen esplika kona-ba serbisu ajensia estadu unidu amerika nian ne’ebé durante ne’e hala’o misaun iha laran atu apoiu prosesu demokrátizasaun iha Timor-Leste.
“Ami nia ajensia sira husi Peace Corps no USAID, hanesan forsa Mariña, Naval estadus unidus nian no ajensia oi-oin husi estadus unidus nian ne’ebé opera iha timor apoiu ba prosesu demokratiku iha Timor-Leste”, tenik Kathleen.
Embasadora ne’e mós hatutan Governu EUA tau ona lista Timor-Leste sai nu’udar ho tarjetu importante husi organizasaun Millennium Challenges Coorporation hodi ajuda povu timor ba tempu naruk nian. (Editor, Lariwa).
