Dili-SMI, Konsellu Dirativa Nasionál - KDN partidu CNRT, Dionisio Babo Soares afirma katak Aliansa Maioria ba Progresu – AMP ne’ebé kompostu husi partidu tolu hanesan PLP, KHUNTO no CNRT sei manan iha Eleisaun Antisipada – EA hodi ukun nasaun ida ne’e.
Esprensa fiar an ne’e Dionisio Babo hato’o ba jornalista iha uma fukun Parlamentu Nasionál – PN, Tersa, (20/02).
‘’Hau atu dehan katak agora deit AMP manan tiha ona ne’ebé buka tan maka atu haforti liu tan AMP atu nune’e bele halo dezenvolvementu ne’ebé diak liu no integradu ba povu iha futuru. Tanba tinan 10 iha tempu CNRT halo dezenvolvementu lubuk ida ona klaru katak seidauk halo satisfeitu, maibe halo tiha ona, hatudu tiha ona esperiensia agora hamutuk ho AMP, PLP, KHUNTO sei hadi’a diak liu tan”, dehan Babo.
Membru Komisaun A PN ba Asuntu Konstitusional no Justisa ne’e husu ba militante no simpatizante partidu atu lalika fiar rumores kona-ba ajitasaun hirak ne’ebé dehan partidu CNRT lakon ona tanba agora ho bandeira AMP.
“Keta fiar propaganda sira ne’e, ema sira hanoin katak atu hafahe AMP maibé ami hakarak prevene tiha situasaun ida ne’e. Tanba ne’e maka CNRT nunka lakon partidu tolu ne’e iha sira nia bandeira iha idak-idak nia”, Babo klarifika ba públiku.
Iha parte seluk, Sekretáriu Jerál partidu KHUNTO José Agostinho da Silva hateten nu’udar partidu foun iha AMP sempre fiar hodi kompete ho partidu sira seluk hodi tuir eleisaun antisipada maibe depende ba desizaun povu nian.
Tanba tuir nia katak partidu hothotu iha forsa polítika no iha ambisaun atu manan iha eleisaun antisipada nian. Ho nune’e, José esplika katak prontu simu rezultadu manan ka lakon iha eleisaun antisipada ne’e. (Editor, Mateus Barros).
