Dili-SMI, Bloku Aliansa Mudansa ba Progresu (AMP) kompostu husi Partido Congreso Nacional Reconstrução de Timorense (CNRT), Partido Libertasaun Popular (PLP), no Kmanek Haburas Unidade Nasional Timor Oan (KHUNTO) konsulta ona ho Prezidente Tribunal Rekursu kona-ba lista kandidatura ba Eleisaun Antisipada nian.
Konsellu Diretiva Bloku Aliansa Mudansa ba Progresso (AMP) Virgilio Smith Hateten, konsultasaun lista kandidatura hodi priense ba preparasaun eleisaun antisipada.
“To’o agora ami seidauk foti formulariu husi Tribunal Rekursu, no dadaun ne’e bloku AMP seidauk aprezenta lista kandidatura ba Tribunal Rekursu, maibé foin mak halo konsultasaun kona-ba legalidade koligasaun nian”, dehan Virgilio Smith, Tersa, (27/02) foin lalais ne’e.
Tuir nia, konferensia nasionál kada partidu ida-idak nian no konferensia koligasaun AMP remata ona, no sei hare’e lista kandidatura, ne’ebé sei desidi husi lideransa superior hodi bele determina atu ba rejistu iha Tribunal Rekursu. (Editor, Konusere).
