Dili- SMI, Governu liu husi Sekretáriu Estadu Konsellu Ministru no Komunikasaun Sosiál – SEKOMS Matías Boavida afirma katak jornalista atu vota livre iha Eleisaun Antisipada presiza hetan notifikasaun husi Sekretariadu Tekniku Administrasaun Eleitorál – STAE.
“Kona-ba mídia, jornalista sira iha loron eleisaun atu ejerze sira nia direitu, atu vota livre persiza hetan notifikasaun husi Sekretariadu Tekniku Administrasaun Eleitorál STAE”, dehan Matías Boavida iha Salaun ajensia internasionál UNDP, Kaikoli, Tersa (27/02) foin lalais ne’e.
Matías esplika katak desizaun jornalista bele vota livre ne’e responsabilidade STAE no Ministeriu Estatal hodi bele fasilita jornalista sira bele ezerse sira nia diretu iha fatin kobertura nian.
Nia klarifika katak dadaun ne’e STAE no Ministeriu Estatal halo ona preparasaun oinsa bele fasilita jornalista no membru instituisaun seguransa bele ezerse sira iha diretu iha kualker fatin votasaun.
Ministeriu Estatal no STAE agora dadaun prepara ona oinsa posibilidade ba jornalista no PNTL atu bele ezerse sira nia direitu sivil politiku iha fatin ne’ebe sira halo kobertura ba, tamba ne’e maka fo hatene antes ba STAE bele notifika, espera sira sei prepara regulamentu no rezolusaun ne’ebé diak“, katak eis dosente Politika iha UNTL ne’e.
Relasaun ho asuntu ne’e, Diretúr Jerál STAE Acilino Manuel Branco argumenta katak jornalista sira atu vota livre iha eleisaun antisipada presiza iha báze legal ne’ebé klaru hodi nune’e STAE bele sujere para garante diretu jornalista vota livre.
Nia klarifika katak to’o agora seidauk iha alterasaun ruma ba Lei Eleitorál nú 9/2017 no sei kontinua uza báze legál ida ne’e hodi aplika iha eleisaun antisipada nian.
“Tuir prosesu ne’ebé mak akontese iha eleisaun 2017 no regula iha nú. 9/2017 lei ida ne’e sei vigor no vale nafatin atu bele uza ba eleisaun ida ne’e. Ate agora seidauk iha interasaun ruma tantu ba lei nomós dekretu sira ne’ebé mak regula kona-ba funsionamentu prosesu ba eleisaun ida ne’e”, dehan Acilino hodi klarifika iha posibilidade jornalista bele vota livre k alae?
Tuir Diretúr Jerál STAE katak ninia parte sempre bázea ba baze legál ruma antes atu halo desizaun ruma tanba buat hotu ne’ebé relasaun ho eleitorál me’e presizamete define iha lei.
Iha fulan Janeiru, Governu liu husi Primeiru Ministru Mari Alkatiri deklara ona katak Governu sei hamosu dekretu lei hodi hafasil estudante no membru siguransa sira bele vota. (Editor, Lariwa).
