Dili-SMI, Hodi salva klinika Bairo-Pite ne’ebé dadaun hetan infrenta problema finanseiru, Movimentu Solidariedade Salva Clinika Bairo Pite – MSS-CBP halo angariasaun públiku hodi kolekta orsan sentavus lima ($. 0,05 centavos) usi komunidade sira iha kapitál Dili.
Husi rezultadu kolekta orsamentu husi komunidade hanesan aileba sira, estudante sira, kondutór sira, motorista, negosiante no pesoál husi estranjeiru sira, MSS-CBP konsege kolekta ona orsan maizumenus ho montante rihun hat resin ($. 4, 708.0,65).
“Kontribuisaun ne’ebé mak ami mai husi povu Aileba, Estudantes, Kondutor, Motorista, Negosiante iha kapital dili inklui kolega estrangeiru sira iha Timor-Leste. Orsan montante $ 4,708.0,65”, dehan Porta Voz MSS-CBP, Faustino Soares iha Salaun Asosiasaun HAK, Kinta, (19/04).
Porta voz Faustino hatutan katak husi totál orsamentu ne’ebé rekoilla tiha ona sei entrega diretamente ba fundador klinika Bairo-Pite iha loron 25 Abril semana oin.
“Ami hakarak informa ba ita hotu katak solidariedade hirak ne’e, sei entrega direitamente ba fundadora Clinika bairo Pite nian iha loron 25 fulan abril agora.” Nia afirma
Faustino mos esklarese katak atividade solidariedade kolekta orsan husi komunidade ne’e la’os deit iha kapitál Dili maibe mós iha munisipiu sira hanesan Manu-Fahi, Ainaro no Suai. Halo mós kobransa husi timor-oan iha Englatera.
Iha biban hanesan porta voz ne’e mós apela ba komunidade katak karik iha sentiment umanidade bele kontribui orsan sentavus lima hodi nune’e bele salva klinika Bairo-Pite ne’ebé dadaun ne’e hetan krize finanseiru.
Husu mós ba instituisaun Polisia Nasional Timor Leste – PNTL atu bele kontinua fó seguransa ba atividade MSS-CBP ne’ebé rekoilla orsamentu ba klinika Bairo-Pite hodi nune’e evita ema deskuiñesidu aproveita situasaun hodi halo kobransa ilegal.
“Ami nafatin husu apoiu PNTL nian atu asegura no tau matan nafatin ba atividade solidariedade popular ida ne’e to’o remata, no evita ema deskuiñesidu sira karik aproveita situasaun ne’e hodi halo kobransa illegal ba sira nia interese ne’ebé laiha transparansia no akuntabilidade ba públiku”, tenik porta voz MSS-CBP.
Posku temporariu ba kontribuisaun popular ne’e hanesan iha kapitál dDli no munisipiu sira mak hanesan ekipa sentral posku temporal iha fatin Assosiasaun HAK ne’ebe kompostu husi universidade hanesan UNTL, UNITAL, UNDIL, movimentu universitariu sira hanesan UEUMB, ASEMA, MHJTL, ativista NGO sira no maluk mídia nasionál sira.
Nune’e mós hala’o husi ekipa juventude voluntariu, ekipa universitariu iha kampuz IOB, DIT, inklui komunidade iha munisipiu Manu-fahi, Suai, Ainaro, inklui komunidade timor oan balun iha Inglatera. (Editor, Mateus Barros).
