Dili-SMI, Eleisaun Antisipada – EA besik dadaun ona, maibe oinsa ho sidadaun ne’ebé muda rezidensia bele vota ka lae? Ministru Administrasaun Estatal no Teritoriu – MAET, Valentim Ximenes klarifika katak wainhira eleitór muda rezidensia mak presiza aprezenta karta deklarasaun husi autoridade lokál ba STAE hodi nune’e bele tuir votasaun.
“Mudansa ba rezidensia oinsa atu utiliza deklarasaun rezidensia, sidadaun sira tenke lori kartaun eleitór atualizadu iha resensiamentu ida ne’e atu ba vota iha sentru votasaun, no sidadaun eleitor sira ne’ebé mak simu tiha ona deklarasaun husi identidade públiku maibé la ba aprezenta iha STAE atu hetan kartaun eleitorál foun, iha suku foun no rezidensia foun sei la autorizadu atu ba vota iha sentru votasaun iha sira nia area hela ba”, dehan Ministru Administrasaun Estatal no Teritoriu - MAET, Valentim Ximenes, liu husi Konfrensia Imprensa iha Kaikoli, Sexta, (20/04).
Ho nune’e ministru Estatal esplika sidadaun sira ne’ebé muda rezidensia tenke lori kartaun atualizadu husi resensiamentu atúal ne’ebé atu vota, nomós tenke aprezenta ba oraun eleitorál
Relasiona ho asuntu refere, Diretór Jerál STAE Acilino Manuel esplika katak parte STAE ninia sei halo esforsu tomak liu husi mekanizmu sira ne’ebé adekuadu hodi bele garantia eleitór sira nia partisipasaun iha eleisaun sira ho masimu.
“Esforsu oinsa atu bele kria tan mekanizmu ida fo tan posibilidade hodi hetan deklarasaun ida ne’e la’os deit atraves xefe Suku sira. Tuir Lei ne’ebé ejiste atu loke dalan tan ba iha entidades públikus sira seluk hanesan Ministériu Edukasaun, Administrador Postu hotu-hotu ne’ebé mak ejizte iha teritóriu tomak”, dehan Alicino. (Editor, Mateus Barros).
