Dili-SMI, Relasiona ho tensaun polítika ataka malu entre lider partidu polítika sira durante kampaña eleitorál, Primeiru Ministru Mari Alkatiri hasoru malu ho Prezidente Repúblika hodi relata situasaun seguransa iha kampaña eleitorál ne’ebé tama ona semana rua.
Hafoin hasoru malu ho PR, Primeiru Ministru Mari Alkatiri esplika maske durante kampaña eleiotrál ne’ebé tama ona semana rua ne’e mosu insulta malu maibe situasaun kontinua la’o normal.
Sekretariu Jerál partidu FRETILIN hatutan katak katak objetivu hasoru malu ne’e atu relata seguransa atúal iha teritoriu laran liu-liu relasaun ho kampaña eleitorál
“Objetivu hasoru malu ho Prezidente da Repúblika Francisco Guterres Lú Olo hodi hato’o situasaun jerál iha rai laran, maske iha kampaña insulta malu maibé to’o agora situasaun la’o ho diak no hakmatek nafatin”, dehan Mari Alkatiri iha Palasiu Prezidensiál Aitarak-Laran, Sexta, (20/04).
Wainhira husu kona-ba lider Aliansa Mudansa ba Progresu – AMP Xanan Gusmão ne’ebé husu atu debate aberta kona-ba asuntu fronteira maritima, PM Alkatiri hatan katak prontu atu halo debate ho xefe negosiador kona-ba fronteira maritima hafoin eleisaun antisipada.
“Hau prontu mais depois de eleisaun, hau lakohi FM ne’e sai problema eleitorál tamba antes de eleisaun hau mós tama ona iha jogu Xanana nian uza fronteira maritima iha kampaña”, dehan Mari. (Editor, Mateus Barros).
