Dili-SMI, Bázea ba kalendariu nasionál ne’ebé deside ona husi Governu kona-ba eleisaun antisipada iha loron 12 Maiu, Governu Xina liu husi ninia embasada Xina iha Timor-Leste apoiu urna rihun ida (1000) hodi bele fasilita eleisaun tinan ida ne’e.
“Iha eleisaun ida ne’e primeira-véez ita husu apoiu ba ita nia belun embasada Xina iha timor, sira apoiu ita atu bele kompleta ita nia urnas iha sentru votasaun hotu iha timor leste, portantu sira nia apoiu ne’e mai iha tempu ida ke lais liu sira produz 1000 ne’e iha loron lima deit”, dehan Ministru Estatal, Valentim ba jornalista iha Palasiu Governu, Segunda, (23/04).
Ministru Estatal ne’e esplika estimasaun Governu nian maizumenus totál urnas hamutuk atus ualu sia nolu (890) hodi distribui ba iha sentru votasaun iha teritoriu laran. Ho nune’e, nia dehan urnas sira ne’ebé apoiu husi Xina ne’e sei distribui ba sentru votasaun sira ne’ebé identifika ona iha teritoriu laran.
Nia hatutan distribuisaun urnas ne’e teknikamente sei deskute ho STAE karik urnas balun at no labele utiliza sei rekopera ho urnas ne’ebé apoiu husi embasada Xina refere.
“Ita iha estasaun votus ne’e teknikamente depois koalia ho STAE deit, sufisiente tamba hetan rezervas de urnas balun a’at karik ita bele taka lalais orsida sei to’o hotu mai ne’e kompletu ida 1000 urnas mai husi xina ne’e ita simu kompletamente”, nia dehan.
Valentim mós klarifika katak apoiu urnas husi embasada Xina ne’e gratuita maibe Governu Timor-Leste rasik mak aluga aviaun hodi tula urna hirak ne’e mai rai-laran.
“Klaru ita tenki uza osan, sira fo mai ita gratuita maibé kuandu to’o iha Bali ita tenki aluga fali aviaun hamutuk hotu ita aluga aviaun Siriwijaya ho nia parseiru air hamutuk hotu 12 mil tula urnas sira ne’e mai iha timor, maibé husi Xina mai to’o bali ne’e gratuita”, Katak Nia
Iha parte seluk, Diretúr STAE Acilino Manuel Branco esplika antes embasada Xina entrega urnas ne’e, Governu sei falta matéria importante rua hanesan urnas no bulletin votu ba eleisaun antisipda nian.
“Iha loron hirak ba kotuk ami preukupa falta material importante rua deit ida mak urnas urnas to’o ona no falta deit buletin votus, bulletin votus mós akompañamentu iha terenu remata ona falta deit sira atu finaliza prosesu balun iha loron 04 fulan maiu mak sira entrega tan hotu ona, hein deit atu eleisaun”, tenik nia.
Nia hatutan, kestaun orsamentu ne’ebé uza ba eleisaun antisipada ne’e seidauk bele relata tanba iha faze implementasaun atividade, ne’ebé depois eleisaun mak halo kordena inter-ministérial hodi bele hatene montante orsamentu hirak mak gasta ba eleisaun antisipada ne’e. (Editor, Mateus Barros).
