Dili-SMI, Tuir ajenda, Kuarta feira (aban, 13/06) nu’udar loron primeiru reuniaun no juramentu deputadu no deputada sira husi V lejizlatura iha Parlamentu Nasionál – PN ne’ebé sei troka deputadu no deputada IV lejizlatura nian.
Diretúr Apoiu Parlamentar, Armando Machado konfirma katak dadaun ne’e intermu tekniku halo hela preparasaun hodi fasilita primeiru reuniaun V lejizlatura ne’ebé akontese aban.
“Ami husi sekertariadu parlamentu nasional halo preparasaun para atu simu ita nia deputadus sira iha V lejizlatur aban”, Dehan Direktur Apoiu Parlamentar, Armando Machado, ba Jornalista sira, iha Sala Konferensia PN, Tersa, (12/06).
Armando esplika katak teknikamente halo ona dezeñu ka layout ba fatin tuur membru V lejizlatura hodi nune’e bele fasilita atividade plenária no juramentu membru V lejizlatura nian.
Armando esplika husi postura ka dezeñu fatin tuur ne’e bázea ba desizaun koferensia lidere bankada sira ne’e deside katak partidu deputadu sira husi partidu FRETILIN no CNRT mak okupa fatin klaran, parte Oeste okupa husi bankada PD no FDD, no parte Leste okupa husi bankada PLP no KHUNTO.
“Kestoes teknikas ne’ebé maka ami prepara maka iha lay out ou sira nia tuur fatin ne’ebé tuir dezisaun tuir konferensia de lideres sira deside tiha ona, bankada parlamentar rua ne’ebé boot FRETILIN ho CNRT sira tuur iha klaran, parte oeste okupa husi bankada parlamentar PD no FDD, ba iha parte leste okupa husi PLP no KHUNTO”, dehan nia.
Nia argument, aban depois reuniaun V lejizlatura no juramentu sei halo mós eleisaun ba Prezidente Parlamentu foun ba V Lejizlatura nian. (Editor, Mateus Barros).
