Dili-SMI, Ministru Defeza no Seguransa – MDS, José Agostinho Sequiera “Somotxo” hala’o ekontru dala ikus ho ofisias no superior instituisaun F-FDTL no PNTL relasiona ho mandatu ne’ebé besik remata ona.
“Ohin ne’e, hau hakrak halo seremonia despedida espesiais ida ho PNTL tomak husi komandante jerál to’o inspektur depois husi parte milítar ba kapitaun no jenerál. Enkontru ida ne’e hanesan enkontru despedida”, dehan MDS Somotxo iha Kuartél Jerál F-FDTL, Fatuhada, Tersa, (12/06).
Iha biban despedia iku ne’e, MDS Somotxo fó agradesmentu wa’in ba instituisaun militár no polisial tomak neebé halo ona esforsu maka’as hodi garante paz no estabilidade durante periodu eleisaun antesipada nian.
“Agradese ba forsa rua ne’e, fó mós parabéns ba sira nia servisu ne’ebé fulan tomak, liu-liu ba fulan ida ho 15 dias kona-ba seguransa ba eleisaun antesipada, to’o anunsiu rezultadu finál”, dehan Somotxo.
Ministru mos hato’o hela mensagen ba ofisiais seguransa tomak prinsipais ba sira katak kontinua nafatin exemplo ida diak, kaer imi nia responsabilidade kompetensia nebe konstituisaun fo ho lei sira tamba lori ida nemak hodi dignifika imi nia an rasik ho instituisaun rua ne’e.
Nia akresenta liu tan katak iha ministru foun mai atu kontinua nafatin ba responsabilidade bot rua nebe mak ita nia fronteira maritime no pair plain nebe forsa rua tenki prepara an hodi asegura ba.
Nia mós rekomenda ba ministru foun atu haree kondisaun infra-estrutura, ekipamentu sira ba instituisaun militár no polísia ne’ebé dadaun ne’e sai preokupasaun boot.
Iha fatin hanesan Komandante Jerál F-FDTL, Xefe Estadu Maijor Jenerál Lere Anan Timur apresia ba serbisu MDS tanba ho mandatu fulan sia (9) deit maibe konsege fó promosaunba veteran na’in hat (4) no hahu lansa komponente Aero.
“Mandatu fulan 9 nia laran MDS halo ona buat barak iha instituisaun rua ne’e, ami sei hakerek iha instituisaun ninia istoria. Primeiru, ida mak promosaun veteranus katuas na’in 4 ba brigadeiru. Segundu, mak inisiativa ne’ebé mak hahu ho komponente AERO nebe mak ita nia pilotu na’in 3 inklui pilotu polisia feto ida ba treinu baziku”, dehan Lere.
Lere mós sujere katak ministru defeza no seguransa foun presiza mai husi veteranu ka militár hodi nune’e bele kompriende diak situasaun militár nian. (Editor, Mateus Barros).
