Dili-SMI, Eis Xefe Bankada partidu CNRT, Arão Noe eleitu sai nu’udar Prezidente Parlamentu Nasionál – PPN ba V lejizlatura periodu 2018 – 2023 ho votu afavor 36, kontra 29 no abstensaun zero.
Arão Noe nu’udar lista kandidatu uniku husi koligasaun Aliansa Maioria Parlamentar – AMP ne’ebé kompostu husi partidu KHUNTO, PLP no CNRT.
Deputadu CNRT, Fidelis Mangalhães ne’ebé SMI konfirma antes eleisaun ba PPN foun, esplika katak Arão Noe nu’udar figura ne’ebé bele lidera PN ho diak iha future.
“Hau fiar katak kandidatu ne’ebe diak liu ba Interese atu AMP nian ba funsionamentu parlamentu ne’ebe mak diak liu mak deputadu Arão Noe”, dehan Fidelis iha PN, Kuarta, (13/06).
Arão Noe promete katak sei kumpri regra no prosedementu legal husi PN hodi halo serbi povu no nasaun.
PPN elitu, liu husi diskursu husu ba membru PN V lejizlatura tomak atu haluha pasadu liu-liu kontradisaun durante tempu kampaña, no tau liman hamutuk hodi serbi povu no nasaun. (Editor, Mateus Barros).
