Díli-SMI, Parlamentu Nasional – PN reprezenta povu Timor-Leste hato’o sentidu kondolénsia ba vitima rai nakdoko iha area Palu no Dongala, Provinsia Sulawesi Sentrál, Indonézia ne’ebé akontese iha loron Sabdu, (29/09) foin lalais ne’e.
Prezidente Parlamentu, Arão Noe Amaral, hatete, Timor-Leste nu’udar nasaun viziñu sente afeitadu ho akontesementu rai-nakdoko ne’ebé akontese iha Indonézia hodi estraga infa-estrutura no hamate komunidade barak tebes.
Ho nune’e, eis deputadu VII Lejizlatura ne’e esplika, PN reprezenta povu sei haruka karta kondolénsia ba vitíma rai nakdoko liuhosi Embadasa Indonézia iha Timor-Leste.
“Ita hanesan pais viziñu sente ho akontesimentu ne’e afeta teb- tebes ba estadu indonézia liu-liu ba vitimas sira, tamba ne’e mak ita halo votus de pezar ida atu fó sira. Sujestaun hosi deputadu sira sei enkamina karta ida ba embaisada indonézia atu hato’o votus pezar ne’e”, dehan Arão Noe de Jesus Amaral, ba jornalista sira iha uma fukun PN, Tersa, (02/10).
Nia mós esplika, nu’udar nasaun viziñu Timor-Leste iha responsabilidade atu fó solidariedade liuhosi apoiu finanseiru hodi bele ajuda vitíma sira ne’ebé afeitadu hosi rai-nakdoko.
“Hanesan pais vizinu ida ita tenki iha solidariedade ba malu hein katak governu mós bele liu husi Konsellu Ministru iha desizaun ruma, apoiu finanseiru ruma hakma’an hodi liu-liu ba vitima sira ne’ebe hetan dezastre, ba sira ne’ebé mate ona ita fo votus ita nia apezar”, dehan nia.
Iha parte seluk, Sekretáriu Estadu Komunikasaun Sosiál – SEKOMS, Mericio Juvinal dos Reis, informa kona-ba kondisaun sidadaun na’in hat ne’ebé dadaun ne’e hala’o estudu iha Universidade Tadulako, Palu, Sulawesi Sentral, fatin akontesementu rai-nakdoko.
Mercio klarifika, tuir informasaun ne’ebé nia parte hetan hosi Ministériu Negósiu Estranjeiru no Koperasaun – MNEK katak estudante na’in hat (4) hanesan: Paulinus Mendes Efi, Paulo Felisberto Carlos Vaz Freitas, Anita Natalia Lourdes da Silva no Gabriela Moniz da Silva ne’ebé dadaun hala’o estudu iha Universidade Tadulako, Palu iha kondisaun diak no la hetan impaktu hosi rai-nakdoko.
“Tuir informasaun hosi Embaisada Indonézia liuhosi ita nia Ministru Negósiu Estranjeiru informa mai ita katak sira na’in hat (4) laiha problema, iha ona kontaktu i hau hanoin ita kontente tamba ita nia ema laiha ida mak sai vitima”, dehan eis Diretúr Ezekutivu NGO Luta Hamutuk ne’e.
Antes ne’e, iha loron Dumingu, (30/09), Embasada Indonézia iha Timor-Leste konfirma katak estudante timoroan na’in hat (4) iha kondisaun diak no iha prosesu evakuasaun hodi kontaktu konsuladu Timor-Leste iha Bali hodi fasilita prosesu lori fila mai Dili.
Tuir mídia nasionál Indonézia hanesan Televizaun Kompas fó sai katak hosi rezultadu rai-nakdoko iha loron sabádu (29/09) semana kotuk to’o ohin loron Tersa, (02/10) maizumenus ema hamutuk 844 ne’ebé mate. No, ema atus resin mak hetan asistensia médiku iha ospitál sira no fatin públiku sira. (Editor, Mateus Barros).
