22
Thu, Aug
0 New Articles

Governu Simu Video “Milagre” Hosi Koreia-du-Sul

Embaxadór Koreia-du-Sul, Chin Bum entrega video “milagre Koreira” ba SEKOMS, Mericio Juvinal, iha Palasiu Governu, Kuarta, (24/10). Foto, Mídia SEKOMS.

Flash News
Typography

Díli-SMI, VIII Governu konstitusionál liuhosi Sekretáriu Estadu Komunikasaun Sosiál – SEKOMS simu video ho titlu “milagre Korea” ne’ebé ko’alia kona-ba prosesu dezenvolvimentu nasaun Repúblika Koreia iha tinan lima-nolu (50) liu ba.

Embaxadór Repúblika Koreia-du-Sul iha Timor-Leste, Lee Chin Bum, hateten, entrega video milagre Koreia ba Governu liuhosi SEKOMS hanesan fahe esperensia kona-ba prosesu dezenvolvimentu Koreia hosi tempu defisil to’o ohin loron sai nasaun ne’ebé avansandu.

“Hakarak fahe esperiensia ida ho Timor-Leste para oinsa karik Timor-Leste bele mós foti esperiensia balun ne’ebé mak relevante ho Koreia nian hodi bele dezenvolve Timor-Leste”, dehan Embaxador, Lee Chin, iha Palasiu Governu hafoin entrega video ba SEKOMS, Kuarta, (24/10).

Diplomata ne’e mós esplika, hasoru malu ho SEKOMS ne’e atu hametin kooperasaun bilateral iha area komunikasaun sosiál ne’ebé iha futuru oinsa bele produz video ida kona-ba susesu traballdor timoroan iha Koreia.

“Ami koalia kona-ba oinsa atu halo produsaun tan video ida bolu video ba susesu traballador nian, ida ne’e para atu motiva juventude sira ne’ebé mak iha Timor-Leste atu ba serbisu iha Koreia”, dehan Lee Chin Bum.

Nia hatutan, embaxada iha ona planu atu fó Governu Timor-Leste hodi haruka traballador timoroan rihun ruma (2000) kada tinan ba Koreia hodi serbisu.

Iha biban hanesan, SEKOMS, Mericio Juvinal Dos Reis Akara, aprésia ba video ne’ebé parte embaxada Koreia entrega ne’ebé ko’alia istória susesu no dezafiu Koreia nian iha tempu pasadu.

“Importansia hosi video ne’e ko’alia kona ba istoria susesu ne’ebé maka Korea iha, i iha mós istória kona-ba oinsa, uluk sira infrenta, sira hasoru problema hanesan ita, sira mós uluk mai ho sidadaun nasaun ne’ebé kiak depois sira hanesan ita, maibé depois sira hakaas án serbisu maka’as, sira disiplina i agora sira tama iha ekonómia ida ne’ebé mak forte”, dehan Mericio.

Liu hosi sorumutuk ne’e, parte SEKOMS fó mós sertifikadu apresiasaun ba ema koreanu ida ne’ebé hala’o estajiu iha SEKOMS nu’udar parte ida hosi kooperasaun entre nasaun rua ne’e.

Eis diretúr Luta Hamutuk ne’e hatutan,  durante enkontru ho embaxada Koreia diskute mós oinsa apoiu departementu audio-vizual SEKOMS nian iha futuru. (Editor, Mateus Barros).

Pin It

Follow us on Twitter

Sign up via our free email subscription service to receive notifications when new information is available.