Díli-SMI, Diretur Ezekutivu Sentru- DESK, Gil da Silva Guterres, konsidera mídia nasionál iha responsabilidade boot atu ajuda estadu hodi promove Timor-Leste ninia adezaun ba ASEAN iha futuru.
Ho nune’e, Gil da Silva, dezafia mídia lokál atu halo publikasaun regularmente kona-ba polítika estadu TL ba adezaun ASEAN iha nivél nasional no internasional.
“ONG Sentru DESK dezafia mídia Nasionais atu inisia pajina espesiál kona-ba ASEAN, liu-liu publikasaun regular iha mídia nasionais sira bele aviza internasionalmente nasaun ne’e nia prontidaun atu adere ba ASEAN, tamba publiku presiza hatene progresu adezaun ne’e to’o iha ne’ebé, liu-liu estadu ka governu nia esforsu durante tinan hitu resin”, dehan, Gil da Silva Guterres, ba jornalista SMI foin lalais ne’e iha nia servisu fatin, Pantai-Kelapa, (Kinta, 28/02) foin lalais ne’e.
Gil informa, parte ONG Sentru – DESK rasik dadaun ne’e planea ona programa debate nakoloke iha televizaun kona-ba asuntu Timor-Leste nia adezaun ba ASEAN ne’ebé tuir planu sei realiza iha TVTL iha tempu badak.
Tuir planu, programa debate televizivu ne’e sei realiza mensalmente iha TVTL hahu iha fulan Abril 2019 no no durasaun programa sei la’o durante episode sia (9) no bele estende ba longo prazu hafoin evaluasaun ba programa refere”, dehan eis Diretúr LABEH ne’e.
Hodi bele realiza planu refere, Gil da Silva, esplika, halo ona enkontru formál ida ho Prezidente Board RTTL, EP, Francisco Gari, hodi tau idea no rekursu hamutuk hodi realiza progrma debate nakloke kona-ba asuntu ASEAN nian.
Nia hatutan, ninia parte iha komitmentu boot atu ajuda estadu liuhosi advokasia kona-ba esforsu Timor-Leste atu tama ba organizasaun ASEAN.
“Sentru DESK sei halo esforsu masimu atu halo advokasia ne’ebé forte hodi tulun esforsu nasaun nian hodi lori Timor Leste tama ba ASEAN”, dehan nia.
Iha parte seluk, antigu Ministru Negosiu Estranjeiru no Koperasaun, José Ramos Horta, ba mídia nasionál iha tinan kotuk (2018) katak kestaun ekonómia sai dezafiu boot ba Timor-Leste atu tama ASEAN.
Tanba ne’e, nia esplika, estadu Timor-Leste tenke esforsu hodi reforsa polítika diversifikasaun ekonómia hodi nune’e bele fasilita lalais tama ASEAN.
Governu Timor-Leste rasik halo ona aplikasaun adezaun TL ba ASEAN iha loron 4 fulan Marsu tinan 2011 wainhira asosiasaun ne’e sei lídera hosi Indonéziu. (Editor, Lariwa).
