Manufahi-SMI: Maske subsídiu $.100 ba kada família ne’ebé Governu promote dezde fulan 2 liu-ba seidauk konsege fahe ba komunidade to'o ohin loron maibe Governu hahu ona fó apoiu emerjénsia ba ema 100 iha suku Betano Postu Administrativu Same, munisípiu Manufahi ne’ebé sai vitíma inundasaun foin lalais ne’e.
Sekretáriu Estadu Protesaun Sivíl – SEPS, Alexandrino Xavier de Araújo, esplika, apoiu emerjénsia hosi Governu ba komunidade afeitadu ba inundasaun mak hanesan fós, supermie, mina, ikan-lata no seluk tan.
“Apoiu emerjénsia ne’ebé apoiu ba komunidade afetadu sira, kada uma ka’in hetan fos saka ida, supermie kaixa ida mina, ikan lata inklui sasan family kids pakote ida”, dehan Alexandrino, iha Betano, semana kotuk.
Araújo husu ba líder komunitáriu sira rekoilla dadus vitíma inundasaun sira ne’ebé seidauk hetan apoiu emerjénsia atu submete ba Governu, nune’e Governu bele distribui apoiu emerjénsia ba komunidade.
“Komunidade sira seluk ne’ebé seidauk hetan apoiu emerjénsia, husu autoridade no xefe suku sira kontinua foti dadus hato’o ba Nasional nune’e governu bele fó apoio ba vitima afetadu sira”, dehan Governante ne’e.
Nia mós klarifika ba públika katak parte Governu dadaun ne’e simu ona dadus provizoriu vitíma inundasaun hamutuk uma-kain 2,528 ne’ebé mai-hosi munisípiu 6 iha teritóriu laran.
“Sekretáriu Estadu Protesaun Sivíl simu ona dadus provizóriu vítima inundasaun hamutuk uma ka’in 2,528, husi munisípiu 6 ne’ebé afeta husi udan bo’ot foin lalais”, katak nia.
Iha parte seluk, Administrador Munisipiu Manufahi, Arantes Isac Sarmento, husu agradesemntu ba VIII Governu konstitusional tanba bele hakman komunidade ninia susar no terus tanba sai vitíma ba inundasaun foin lalais ne’e.
“Agradese ba Sekretaria Estadu tamba liu-hosi apoiu ne’e bele hakman komunidade sira nia kondisaun hafoin infrenta inundasaun”, dehan Arantes.
Tuir dadus provizóriu ne’ebé ekipa Jestaun Risku Dezastre Munisípiu Manufahi rekolla no relata ona ba SEPS, ho totál uma ka’in 470.
Maibe vítima uma ka’in hamutuk 120 maka hetan ona apoiu emerjénsia no vítima uma ka’in hamutuk 350 sei hetan apoiu emerjénsia iha fase daruak nian.
Udan no anin-boot ne’ebé akontese foin lalais iha parte leste no norte estraga infra-estrutura hanesan ponte no Estrada inklui fasilidade públiku seluk. (Editór, Ajito Soares).
