Suai-SMI: Komandante Jerál FALINTIL-Forsa Defeza Timor-Leste – F-FDTL, Majór Jenerál, Lere Anan Timur, bolu atensaun ba komunidade Covalima hodi hametin paz no estabilidade iha liña fronteira liu-liu area Tunubibi no Salele.
“Ha'u husu ba imi komunidade sira iha fronteira liu-liu iha Covalima atu kria paz ho ita nia nasaun viziñu Indonesia mezmu rai no baliza mak haketak ita maibe ita hanesan maun-alin, ne’e mak ha'u apela ba imi liu-liu imi fronteira oan atu kuda dame no domin iha fronteira”, dehan Xefe Estadu Maior Jenerál F-FDTL, Majór Jenerál, Lere Anan Timur, Sesta, (24/07) wainhira partisipa seremonia tinan 20 milítar Nova Zelandia mate iha area Covalima.
Jenerál fitun rua ne’e argumenta, hanesan sidadaun Timor-Leste ne’ebé moris iha liña fronteira ho nasaun viziñu Indonézia nian presiza hametin no promove relasaun amizade hodi nune’e labele hamosu konflitu iha futuru.
Tanba, moris hanesan viziñu iha liña fronteira sempre mosu tentativa no dezafiu sira ne’ebé bele provoka tensaun konflitu entre komunidade hosi nasaun rua ne’e.
“Ita moris iha fronteira dezafius barak, ate ami iha rai klaran rai ulun ne’eba fronteira ho suku de’it mós sei iha problema tanto mais fronteira entre nasaun ninian ne’e problema boot”, katak Lere.
Maske durante ne’e laiha konflitu enrte milítar hosi rai rua (TL-Indonézia) maibe sempre mosu konflitu relasaun ho aktu hosi ema deskuiñesidu sira ne’ebé halo movimentu na’ok animal iha liña fronteira refere.
“Problema ne’ebé sempre mosu iha fronteira la’os forsa Indonézia mak mai tiru iha ne’e ka ou tama iha Timor, maibe imi mak na’ok malu,sira mai na’ok imi nia karau, imi mós ba na’ok sira nia karau ida ne’e ba mai de’it. Iha Tilomar mós dala-ruma maluk balun organiza krime oho malu ba na’ok karau buat sira ne’e hotu ida ne’e mak dala ruma estraga ita nia relasaun”, tenik nia.
Líder masimu hosi instituisaun F-FDTL ne’e mós apela ba komunidade iha liña fronteira atu fó honra ba aswa’in milítar Nova Zelandia ne’ebé mate iha fronteira tinan 1999 ho aktu kria paz no hakmatek iha area refere. (Editór, Francisca Soares).
