Atambua-SMI: Maizumenus membru organizasaun artemarial Persaudaraan Setia Hati Terate - PSHT hamutuk ema na’in 200 resin mak sei subar hela iha área Malaka, Atambua, munisípiu Belu, Nusa Tenggara Timur – NTT – Kupang hosi totál lista ofisial naran membru PSHT hamutuk 361 ne’ebé hakat fronteira ho ilegal atu hasae sintu iha Atambua.
Maske, foin lalais ne’e, autoridade seguransa (POLRI) Atambua – Indonézia kaptura ona membru PSHT hamutuk ema na’in 133 no deporta ona mai Timor-Leste liu-hosi fronteira Batugade, Mota-Ain, bazeia ba serbisu hamutuk autoridade imigrasaun rai rua nian foin lalais ne’e.
Konsuladu Timor-Leste ba Kupang – Indonézia, Jesuino dos Reis Matos, esplika, tuir dadus ne’ebé parte konsuladu simu katak maizumenus membru PSHT hamutuk ema na’in 361 mak rejistradu hakat fronteira ho ilegalmente tama Atambua ho intensaun atu hasa’e sintu.
“Tuir lista iha membru PSHT hamutuk 361 ne’ebé tama mai Atambua ho ilegal atu hasa’e sintu. Orseik polisia iha Atambua kaptura membru PSHT hamutuk 133, no restu hosi totál ema na’in 361 ne’e sei espalla iha Atambua, tuir informasaun ema hirak ne’e sei kontinua hela iha Atambua, área malaka nian”, dehan, Konsuladu Timor-Leste ba Kupang – Indonézia, Jesuino dos Reis, ba SMI liu-hosi via telefone, Tersa, (10/08).
Liga ho kondisaun timoroan membru artemarsial PSHT iha Atambua, Jesuino, eplika, parte konsuladu halo ona aprosimasaun ba parte kompetente sira atu bele buka solusaun ba membru PSHT ne’ebé tuir lista sei subar iha área Atambua nian inklui lori fila sira ne’ebé kapturadu.
“Iha ne’e, depois ha’u simu informasaun, ha’u esforsu buka solusaun hodi lori fila membru PSHT ne’ebé tama mai ho ilegal. Ha’u kordena ona ho DANREM Kupang hodi haree mekanizmu sira hodi lori fila sira tama mai ilegal ne’e, tanba iha ne’e aplika mós serka sanitáriu hanesan iha ita nia rai”, Reprezentante TL iha Kupang ne’e.
Iha parte seluk, líder organizasaun artemarsial PSHT, Baltazar Lemos, hatete ba mídia lokal iha rai-laran katak nia rasik laiha kuiñesementu kona-ba ninia membru ne’ebé tama ilegal iha Atambua hodi hasa’e sintu.
Baltazar, afirma, membru hirak ne’ebé tama ilegal ba Atambua hodi hasa’e sintu ne’e laiha karta autorizasaun hosi parte organizasaun tanba durante ne’e Governu seidauk fó autorizasaun hodi hala’o atividade artemarsial nian.
“Sira ba sa’e sintu iha Indonézia, sira ba ne’e pesoal, no ilegmente, sein kuñesementu hosi ami, ne’in governu, sira ba ne’e ilegal”, katak, Baltazar.
Membru PSHT hamutuk ema na’in 113 ne’ebé hetan kapturasaun hosi autoridade seguransa Indonézia foin lalais ne’e iha pontu entrada rua, iha área Fatubenao A, aldeia Fatubenao, Postu Administrativu Atambua Villa, Munisípiu Belu.
Hosi total 133 ne’e kompostu hosi mane hamutuk ema na’in 105 no feto hamutuk ema na’in 8.
Tuir dadus ofisial ne’ebé SMI asesu kona-ba identidade membru PSHT hamutuk 36 hakat fronteira ho ilegal ne’e mai hosi munisípiu 9 mak hanesan Baucau, Covalima, Bobonaro, Ermera, Liquiça, Díli, Ainaro, Manatuto no Viqueque. (Editór, Caleri).
