04
Sat, Dec
0 New Articles

Falla Komandu PNTL, Membru UPF Deve Foos Komunidade

Membru UPF rona hela esplikasaun hosi komandante antes hala’o atividade patrollamentu iha liña fronteira. Foto, Mídia PNTL.

Reportagen Klean

Bobonaro-SMI: Problema distribuisaun alimentasaun ka ai-han hosi komandu Polísia Nasionál Timor-Leste – PNTL ba Unidade Polísia Fronteira – UPF ne’ebé tarde to’o lori tempu fulan ida ka rua, obriga membru UPF tenke deve foos komunidade iha kióske hodi konsumu.

“Membru UPF sira deve foos iha Kios, ne'ebé besik hodi hein osan alimentasaun too ba sira mak selu ema nia deve”, dehan, Komandante Kompaña A Inspetór Paulo Assis Belo,  ba SMI iha Tunu Bibi-Maliana, Sexta, (13/11) fulan kotuk liu-ba.   

Tuir komandante ne’e, montante orsan ba alimentasaun ne’ebé kolóka ba membru UPF sira ne’e sufisiente maibe difikuldade boot mak distribuisaun hosi komandu nasionál ne’ebé tarde fó impaktu ba nesesidade membru UPF nian.

“Kada membru ida, loron ida han $.7, 050 maibe susar atu too lalais ami hodi uza ba nesidade lor-loron, fulan ida lae fulan rua (mak) foin too”, dehan, Paulo Assis.

Liga ho asuntu refere, parte SMI iha loron (18/11) koko atu konfirma ho Komandante Jerál PNTL, Komisariu, Faustino da Costa, liu-hosi gabinete mídia komandu nian maibe labele hetan entrevista ho razaun asuntu refere sei hetan resposta hosi Porta Voz PNTL, Superintendente Xefe, Arnaldo Araújo.

Nune’e, iha loron (23/11) SMI kontinua tenta hodi manda Short Message Service – SMS ba Whatsapp ba porta-voz, Superintendente Xefe, Arnaldo Araújo, maibe ninia resposta katak liga ho asuntu alimentasaun ne’e kompeténsia komandu PNTL, Faustino da Costa, atu responde.

“Atu husu ba Sua-exelénsia ne’e so komandante jerál (Faustino da Costa) mak bele fó resposta”, dehan porta-voz PNTL liu-hosi SMS badak ba redasaun SMI.

Iha parte seluk, maske problema ne’ebé membru UPF infrenta ne’e presiza hetan resposta ho estra-ordináriu, maibe Komandante UPF, Superintendete, João Sancho Pires, klarifika ho razaun ne’ebé la fundamentu.

Nune’e, nia afirma, mezmu ninia membru UPF sira hasoru dezafiu bs ai-han maibé kontinua ho komitementu atu asegura  no proteje liña fronteira hosi inflitrasaun illegal sira.

“Osan alimentasaun mak tama tarde, komandu mós dez-araska hela hodi koordena ho ministériu balun, atu bele apoia alimentasaun fahe ba kompaña tolu ne’e. Alende ne’e ami mós koordena ho CRN (Empreza) bele apoia hela ami hodi halo distribuisaun foos ba kompaña (Postu) tolu Maliana, Suai no Oekusi,” dehan, Komandante UPF, Superintendente, João Pires, ba mídia online Lafaeknews, Tersa, (01/12).

Tuir observasaun SMI hatudu katak problema distribuisaun alimentasaun ba membru UPF iha liña fronteira ne’ebé tarde la’os foin mak akontese maibe besik ona tinan 20 resin nia laran. (Editór, Caleri Alves).

Pin It

Follow us on Twitter

Sign up via our free email subscription service to receive notifications when new information is available.