Maliana-SMI: Problema bee-moos ne’ebé to’o ohin loron Governu seidauk bele rezolve fó impaktu ba komunidade hamutuk rihun rua (2000) iha aldeia Solu Golo, suku Holsa, Postu Administrativu Maliana, Munisípiu Bobonaro, durante ne’e konsumu de’it bee-merak hosi mota Holsa nian.
Komunidade aldeia Solu Golo, Casmiro Gomes, sente triste tanba Timor-Leste hetan ukun-an ona besik tinan 20 maibe Governu laiha kapasidade atu rezolve bee-moos iha teritóriu ikus-mai sira tenke pasensia hodi konsumu bee-merak ba nesesidade lor-loron nian.
“Ha’u senti triste tanba komunidade barak liu ne’e hotu-hotu tenke asesu bee-mota tolu ne’ebé mak iha mota laran ne’e, maibe to’o tempu bailoron naruk bee-mota ne’e mós sei maran taun susar ba ami halo (uza) ba nesesidade lor-loron”, dehan, Casmiro Gomes, ba SMI foin lalais ne’e iha Suku Holsa, Munisípu Bobonaro.
Durante ne’e família uma-kain hamutuk atus ualu lima nolu resin tolu (853) uza lisuk bee-possu tolu iha suku Holsa ne’ebé wainhira tama bai-loron naruk bee-maran ikus mai komunidade tenke kuru bee-merak hosi mota hodi konsumu.
Komunidade seluk, Vitor Martins, afirma, durante ne’e parte Servisu Agua no Saneamentu – SAS munisípiu Bobonaro laiha asaun ruma ba preokupasaun komunidade ba bee-moos refere.
“Durante COVID-19 parte SAS seidauk mai haree komunidade mak infrenta hela no komunidade nia moris no laiha ajudasaun ruma to’o agora no sira mós nunka mai haree komunidade sira hemu bee-merak ka bee-moos sira nunka mai haree”, tenik Vitor.
Nune’e, nia husu ba Governu liu-liu SAS munisípiu Bobonaro atu bele atu atensaun ba komunidade suku Holsa ninia preokupasaun ba bee-moos tanba durante ne’e la’o kilometru ida atu kuru bee-mota hodi konsumu.
“Hau husu ba Governu atu tau matan ba ami povu nia moris hodi kanaliza bee-moos liu-liu ba iha aldeia Solu_Golo nia ne’e atu nune’e ami labele susar ba bee-moos. Tamba atu konsumu de’it ba bee-moos ami tenke la’o too kilometru ida mak hetan bee-moos hodi uza ba lor-loron”, katak nia.
Kabe ba asuntu refere, Diretúr SAS munisípiu Bobonaro, Adriano da Cruz, koko fó sala-fali ba komunidade no impase polítika ne’ebé la’o iha rai-laran.
“Ita nia polítika agora ne’e problema hahú hosi 2016 to’o agora, nune’e mós SAS seidauk hetan projetu bee ne’ebe di’ak. Prejetu bee ho númeru boot ne’e la’os konpeténsia SAS (munisípiu) nia maibe problema nasionál. Projetu ne’ebé mak ho númeru boot ne’e la’os kompeténsia SAS (munisípiu) maibe tenderizasaun hosi nasionál”, dehan nia.
Adriano da Cruz, kontinua aprezenta razaun seluk mak komunidade aldeia Solu Golo laiha responsabilidade hodi asegura kanu bee-moos ne’ebé parte SAS monta ona.
Maibe, antes remata entrevista parte SAS munisípiu Bobonaro sei kontinua esforsu hodi responde nesesidade komunidade aldeia Solu Golo kona-ba bee-moos refere. (Editór, Caleri Alves).
