Díli-SMI: Esbosu Dekretu Lei Kriminaliza Defamasaun ne’ebéinísia hosi Ministériu Justisa - MJ hetan reasaun maka’as hosi asosiasaun jornalista nian inklui entidade sira hanesan sosiadade sivil, akademiku no seluk tanba konsidera hamate demokrásia iha rai-laran.
Relasaun ho esbosu Dekretu Lei refere, jornalista Rádiu Komunidade sira ne’ebé durante ne’e haknár an iha Asosisaun Jornalista Timor Lorosa’e – AJTL hatudu ninia argumentu kontra ba esbosu Lei Kriminaliza Defemasaun refere.
Jornalista Radiu Maubisse Mauloko, Joaquim Coutinho, konsidera esbosu lei kriminalizasaun defamasaun ne’ebé MJ elabora no atu subemete ba Konsellu Ministru ne’e sei hamate Liberdade espresaun povu nian iha nasaun demokrátiku hanesan Timor-Leste.
“Nia impaktu sei la di’ak la’os ba de’it jornalista sira maibe mós ba sidadaun sira hotu. Ezemplu se governante ida foti osan ka ema uza sala patrimoniu estadu nian ita hetan ka, haree labele hasee ka hakerek iha notísia hodi fo sai. Se ita fó sai ninia konsekuensia todan, multa ho osan, tama prizaun ou bele mate”, dehan Joaquim, ba SMI, Tersa, (07/07) wainhira redasaun SMI hala’o entrevista liu-hosi kanal mídia online.
Nune’e, Jestór Rádiu Mauloko, bolu atensaun ba reprezentante jornalista sira no mídia na’in iha Conselho de Imprensa – CI inklui ativista, sosiadade sivil no igreja atu bele hamutuk hodi luta kontra esbosu dekretu lei refere.
“Se governu lori esbosu Lei ne’e ba debate iha Konsellu Ministru liu (pasa) ita husu atu ita nia reprezentante iha CI, sosiedade sivil, ativista sira, igreja no ita hotu atu koa’lia maka’as kona-ba asuntu refere”, dehan Coutinho.
Coutinho argumenta, nia parte sei apoiu fó apoiu ba reprezentante jornalista eleitu hosi AJTL ba CI, Virgílio da Slva Guterres, atu luta kontra polítika kriminaliza defemasaun.
Hanoin hanesan mós mai hosi jornalista Rádiu Komunidade Raihusar, Juliao de Andrade alias “Abekha” hatete, esbosu lei kriminaliza Defemasaun ne’e hanesan projetu rejime ditadura ne’ebé sei hamate demokrásia iha rai-laran.
“Ha'u nia hanoin kona-ba Esbozu Dekretu Lei Kriminalizasaun Defamasaun ne'e, hanesan Obra ida atu hamate Demokrasia iha TL”, dehan Juliao
Tan-ne’e, eis-ativista UNITAL ne’e, bolu ema hotu-hotu atu tau forsa hamutuk hodi halo asaun kontra esbosu Lei Kriminaliza Defamasaun ne’e.
Nia reforsa, nu’udar jornalista rádiu komunitariu ne’ebé sai membru AJTL sei fó apoiu masimu ba reprezentante jornalista iha CI hanesan Virgílio Guterres “Lamukan” hodi hala’o asaun demonstrasaun hasoru Ministru Justisa.
“Ita presiza unifika forsa hosi parte hothotu atu bele hala’o demonstrasaun kontra Dekretu Lei efere. Hanesan Jornalista Radiu Komunidade e membru AJTL,fó apoiu masimu ba Sr, Virgilio hodi kontra Dekretu Lei Refere”, katak nia.
Nune’e mós, jornalista Rádiu Komunidade Lian Matebian, Agus Guterres, esplika, di’ak liu Governu tau perioridade ba Lei Anti Korupsaun kompara ho lei kriminaliza defamasaun.
“Tuir hau nia hanoin lei ne’e la persiza eziste maibe oinsa mak governu tau prioridade ba asuntu sira ne’ebé mak dadaun ne’e sai preokupasaun boot iha timor hanesan kazu korupsaun. Parlamentu mós komesa halo ona debate Lei Anti Korupsaun - LAK, tuir loloos MJ no PJR inklui governu tenke tau asuntu ida nee sai prioidade prinsipal para prosesu tuir lei la’os fali lei kriminalizasaun”, dehan Agus.
Jornalista ne’e mós konsidera esbosu lei kriminaliza defamasaun ne’e sei taka-dalan ba ema ativista no jornalista sira atu halo kritika ba Governante sira ne’ebé halo infrasaun hanesan komete mal-administrasaun no korupsaun.
Parte seluk, antes ne’e, Ministru Justisa, Manuel Cárceres, esplika, maske esbosu Lei Kriminaliza Defezmasaun ne’e dadaun sai preokupasaun nasional no internasional maibe Governu sei kontinua avansa tanba Estadu Timor-Leste ninia futuru. (Editór, Rui Santos).
