20
Sat, Jul
0 New Articles

Governu Iha Ona Kandidatu Troka Julio Hornay

Komandante Jerál PNTL, Komisariu Julio Hornay. Foto, Mídia PNTL.

Breaking News
Typography

Díli-SMI, Ministru Interior Interinu, Filomeno Paixão de  Jesus, konfima ona katak iha ona lista naran kandidatu pakote rua ne’ebé deside hosi Konsellu Superior Seguransa hodi troka Komandante Jerál-KomJer Polisia Nasional Timor Leste – PNTL, Komisariu Julio Hornay no Faustino da Costa.

Maske nune’e, Filomeno Paixão, la esplika detallu naran kandidatu sira hodi pakote rua ne’ebé Konsellu Superior Seguransa deside. No, nia promete sei tetu didiak lista kandidatu hosi pakote rua antes submete ba Konsellu Ministru atu halo desizaun.

“Kandidatu hasa’e ona iha kandidatu rua, pakote mai rua, maibe hau hanesan ministru hau tenki tein tasak mak lori sai ba iha Konsellu Ministru, entaun hau hasa’e pakote ida deit, hau labele dehan sai lai pokote saida. Depois kuandu to’o iha konsellu ministru deside sei hatene, aban, bairua imi hatene ona”, dehan Ministru Interior Interinu,  Filomeno Paixão, iha Palasiu Prezidensial Aitarak-Laran, Tersa, (12/03).

Atual Ministru Defeza ne’e mós esplika, kritéria minimu atu sai komisariu PNTL mak pelemenus kargu superintendente Xefe durante tinan hat, pelemenus iha ona kursu kona-ba defeza no seguransa nian.

“Kandidatu ema simples teknikamente ema ne’e tenke pelo menus nia tenke Superintendente Xefe tinan haat ona iha nia kargu, i depois superintendente mak hanesan iha forsa ne’e Koronel, mas iha polisia superintendente sefi. Depois pelo menus kursu kona-ba defeza seguransa, ida ne’e importante, komisariu ne’e tenki hatene saida mak defeza, saida mak seguransa konseitu ne’e tenki iha nia ulun mentin, estruturadu ona para ita ko’alia ba ita deside hola desizaun ne’e fasil”, dehan Paixão.

Hatan kona-ba igualdade jeneru iha lista kandidatu pakote hodi troka KomJer, Paixão, klarifika seidauk iha kandidatu feto iha polísia ne’ebé priense kriteria hodi sai komisaria, maibe nia fiar katak iha tinan lima oin mai sei iha kandidatu feto hodi okupa karju KomJer nian.

“Infelismente iha polísia seidauk iha, tantu iha polisia, komu F-FDTL seidauk iha feto to’o priense kondisaun sira ohin hau dehan ne’e, superintendente xefe, halo ona kursu defeza seguransa buat sira ne’e seidauk iha, hau sente iha tinan lima nia laran bele iha”, tenik nia.

Komandate Jeral PNTL, Komisariu Julio Hornay, antes ne’e deklara ona ba mídia nasional katak prontu simu desizaun hosi Governu kona-ba ninia mandatu ne’ebé sei remata iha fulan marsu tinan ida ne’e.

KomJer Julio Hornay ho ninia Vise Faustino da Costa, ninia mandatu ofisialmente sei remata iha loron 27 fulan Marsu tinan 2019.

Relasaun ho mandatu KomJer Julio Hornay, parte sosiadade sivil hanesan Fundasaun Mahein – FM konsidera membru PNTL ho kargu Superintendete Xefe barak mak iha potensia hodi asume kargu hanesan KomJer ba tinan hat oin mai. 

Tuir observasaun SMI iha mídia sosiál hanesan facebook públiku debate kona-ba pesoal sira ne’ebé iha kompetente atu sai kandidatu ba KomJer hodi troka Komisariu Julio Hornay mak atual Komandante Unidade Polisia Maritima – UPM, Superintendente, Lino Saldanha, Komandante Servisu Investigasaun Kriminal – SIK, Superintendente, Jorge Monteiro no Komandante Munsipiu Ermera, Superintendente, Natercia Martins. (Editor, Lariwa).

fShare
0
Pin It

Follow us on Twitter

Sign up via our free email subscription service to receive notifications when new information is available.