Lospalos-SMI: Labarik ida naran Benjamin Franklin Foelo, ho idade 15 hetan mate-isin bebe feto ne’ebé ema deskuiñesidu soe iha area Aldeia Chaulutru, Suku Fuiluro, Postu Administrativu Lospalos, Munisípiu Lautém ho kondisaun asu han hotu ona orgaun balun hanesan ulun no kelen sorin.
Almedina da Conçeicão, hanesan inan hosi labarik ne’ebé hetan mate-isin bebe ne’ebé ema deskuiñesidu soe, haktuir, ninia oan hetan bebe ne’e iha parte lorokraik maizumenus tuku 5:00 wainhira fila hosi eskola.
“Dadersan ha’u ba servisu, no balarik sira ba eskola meudia, maibe iha tuku lima lorokaik, ha’u nia oan mane (Benjamin) mak hetan uluk bainhira sai hosi eskola iha tuku 5 Lorokaik”, dehan Almedina da Conçeicão, ba SMI iha ninia rezidénsia aldeia Chaulutru Kinta, (23/07).
Tuir sasin ne’e, mate-isin bebe feto ne’ebé asu dada ba iha sira nia rezidénsia ne’e kuaze asun han hotu ona orgaun balun hanesan ulun no ain sorin.
Almedina, hatutan, nia-oan Benjamin sente trauma no tauk wainhira haree akontesementuntu asu dada mate-isin bebe ba sira nia rezidénsia, no hein to’o ninia inan fila hosi serbisu mak hodi fó hatene kona-ba asu lori mate-isin bebe ba sira nia rezidénsia.
“Ha’u la espera su lori bebe mai iha ami nia rezidénsia. Akontesementu ne'e, ha’u nia oan mós tauk la-tama uma laran no hein ha’u sai serbisu mai uma mak bolu ha’u dehan asu lori bebe mai ami nia rezidénsia”, Almedina konta ho mataben turuk iha hasan.
Nia esplika tan, tuir tradisaun timor no kultura iha rai Lospalos wainhira hetan mate-isin bebe ne’e iha inisiativa atu hakohi maibe tanba relasaun ho aktu krime mak nia kontaktu ba parte seguransa hodi halo prosesu ba oin.
“Loloos ne’e atu halo tuir kultura ha’u halo'ot ona, maibe tamba akontesimentu ne'e relasaun ho krime, tenke lori ba justisa tamba lei iha atu regula hahalok ne'e, nune'e ha’u liga kedas ba polísia Eskuadra Lospalos hodi tu'un direita no identifika kedas dadus”, tenik nia.
Relasaun ho akontesementu refere, nia afirma, pronto kolabora ho parte polísia investigasaun hodi fó informasaun karik parte seguransa presiza.
Akontesementu soe bebe ne’e hanesan foin dala-uluk akontese iha aldeia Chauluturu, Suku Fuiluro.
Iha parte seluk, Americo da Costa, hanesan komunidade ida husu ba líder komunitariu suku Fuiluro atu halo serbisu hamutuk ho parte seguransa hodi buka tuir suspeitu ne’ebé seo bebe ne’e.
“Husu ba líder komunitaria sira iha Postu Administrativu Lospalos atu identifika sira nia Komunidade ho didiak atu ita bele identifika suspeitu soe bebe feto oan ne'e”, katak nia. (Editór, Guido Santos).
