Díli-SMI: Vise Kordenador Jerál COVID-19, Narciso Fernandes, esplika, ohin loron tersa, (04/08) rejista Timor-Leste rejista fali kazu foun pasiente ema na’in 1 ne’ebé konfirmadu pozitivu COVID-19 hafoin rezultadu teste ba ema na’in 111 ne’ebé tama TL iha loron 22 Jullu 2020.
“Ohin loron 4 fulan Agostu tinan 2020, ha’u hakarak hato’o ba públiku tomak, ita rejista fila fali kazu konfirmadu foun ida (1) hosi COVID-19 iha ita-nia rai doben Timor-Leste”, dehan, Narciso Fernandes,liu-hosi konferénsia imprensa, iha Palásiu da Cinzas, Kaikoli, Tersa, (04/08).
Vise Kordenador Jerál COVID-19, relata, kazu konfirmadu pozitivu COVID-19 ne’e pasiente mane ida ne’ebé nu’udar sidadaun nasaun estranjeiru nian.
“Relasiona ho kazu ida ne’ebé sa’e konfirmadu ohin, ha’u hakarak informa katak ema mane ho idade 46, sidadaun Indonéziu hosi jawa sentral/jawa tenggah”, dehan nia.
Nia, relata-tan, sidadaun estranjeiru mane ne’e ninia viazen mai Timor-Leste liu-hosi Kupang-Indonéziu ho aviaun Citylink iha loron 21 Jullu 2020.
Hafoin sidadaun estranjeiru ne’e halo viazen mai Timor-Leste liu-hosi terestre ho kareta Avanza ne’ebé la’o hamutuk ema na’in 6 ne’ebé kompostu hosi feto ema na’in 1, labarik ema na’in 1 no mane maluk selu hamutuk ema na’in 4 inklui motorista kareta refere.
“Mai sa’e aviaun Citylink to’o kupang dia 21 Jullu, sae kareta Avanza hamutuk sira na’in 6, labarik 1, feto 1 no mane 4 inklui motorista”, katak nia.
Parte Ministériu Saúde mós rejista katak iha loron 22 Jullu 2020, maizumenus ema hamutuk 111 mak tama mai iha Timor-Leste, no identifika ema hamutuk na’in 6 mak tama fronteira ho ilegál.
“Dia 22 Jullu sira hamutuk 105 pesoas tama legál. No, (ema na’in) 6 ilegal mai Timór, hamutuk (ema) na’in 111”, katak Kordenador Jerál COVID-19.
Nia informa, hosi ema na’in 111 ne’ebé tama iha TL hotu-hotu iha kuarentina Tasitolu hafoin ekipa COVID-19 hasai sampel iha loron 30 Jullu 2020 ne’ebé ninia rezultadu iha 3 Jullu hatudu pozitivu ema na’in ida.
“Sira direta mai fatin kuarentena Tasitolu, Depois 8 dias ekipa foti sampel sira hotu nian, iha dia 30 jullu no hodikalan (3/08) resultadu sai pozitivu 1. Agora dadauk pasiente ne’e iha ona Izolamentu Vera-Cruz”, tenik nia.
Hosi total kumulativu exame laboratóriu hamutuk ema na’in 4244 ne’ebé ninia rezultadu hatudu katak ema na’in 4186 mak sai negativu. Totál Ema iha kuarentina ka konfinamentu obrigatóriu hamutuk ema na’in 256.
Nune’e mós totál ema Auto-kuarentena hamutuk ema na’in 144 ne’ebé iha kapitál Díli hamutuk ema na’in 140 no restu iha munisípu hamutuk ema na’in 4.
Iha parte seluk, totál ema ne’ebé liu-ona periodu kuarentena ka konfinamentu obrigatóriu hamutuk Ema na’in 2883 ne’ebé kompostu hosi ema na’in 2462 hela iha kapitál nasaun no ema na’in 421 hela munisípiu sira iha teritóriu laran. (
Relasiona ho kazu foun refere, Vise Kordenador Jerál COVID-19 hosi Ministériu Saúde husu ba komunidade atu labele pániku maibe oinsa mantein halo prevensaun ba surtu refere.
“Ho evolusaun surtu COVID-19 iha mundu, Ministériu Saúde husu ba komunidade hotu atu labele pániku no mantein nafatin halo prevensaun ba COVID-19”, dehan nia.
Nune’e mós husu ba komunidade atu kontinua uza maskara no displina hodi kumpri regra sira kona-ba prevensaun COVID-19 nian. (Editór, Guido Santos).
