25
Mon, Oct
0 New Articles

Ultimatum Governu Ba Komunidade 140 Iha Rotunda Comoro Halot Sasan

Edifísiu Eskola São Miguel ne’ebé besik estrada dirasaun Rotunda to’o Tasitolu. Foto, Internete.

Flash News

Díli-SMI: VIII Governu liu-hosi Ministériu Obras Públikas – MOP hasai ona despasu ikus hodi fó ultimatum ba komunidade uma-ka’in 140 ne’ebé simu ona kompensasaun tenke halot ona sasan hodisai hosi fatin refere iha semana rua nia laran.

Despasu ultimatum ba komunidade uma-ka’in 140 hosi rotunda Comoro to’o Tasitolu ne’ebé asina hosi Diretúr Jerál MOP, Rui Freitas Guterres, ne’e ho razaun atu melloramentu estrada protokolu hosi Rotunda to’o Tasitolu.

“Husu ba komunidade afeitadu hosi melloramentu estrada protokolu husi Retunda Kumoro to’o Tasi-tolu atu hamamuk uma ou fatin hamutuk 140 ne’ebé hetan ona kompensasaun.

"Abitante sira presiza hamamuk uma ou fatin sira ne’ebé hetan ona indiminizasaun durante semana rua-nia laran hahú husi loron despaxu ka avizu ne’e fó sai”, dehan, Diretúr Jerál MOP, Rui Freitas, liu-hosi komunikadu, Tersa, (17/08).

Rui Guterres, hatutan, wainhira aviza ne’ebé fó sai ne’e laiha konsiderasaun ka kolaborasaun di’ak hosi komunidade sira ne’ebé simu ona indiminizasaun hosi Governu mak parte MOP sei aplika demulisaun ka sobu iha tempu badak nia-laran.

Iha despasu MOP ne’e mensiona kioske, loja no uma sira hosi dirasaun Rotunda Prezidente Nicolau Lobato to’o trosu Tasitolu ne’ebé rejistadu hetan ona pagamentu tenke hamamuk ona fatin hirak ne’e.

“Ba komunidade 140 ne’ebé parte habitasaun kompensadu, sira ne’ebé iha rejistu hetan ona kompensasaun hosi trosu Rotunda Prezidente Nicolau Lobato ba to’o trosu Tasitolu, ikus liu atu hamamuk uma/kios no loja sira (durante) semana rua hosi data avizu ida-ne’e”, tenik nia.

Hosi despasu ne’e mós parte MOP esplika klaru ona katak despasu ho númeru 248 DGOP/DNEPCC/VIII/2021 ne’e nu’udar avizu ikus ne’e ne’ebé Governu fó ba komunidade uma-ka’in 140 atu sai hosi fatin refere.

Wainhira komunidade la-kumpri aviza ne’ebé fó sai mak MOP sei orienta parte kompetente atu sobu uma afeitadu sira.

“Servisu ekipamentu pezadu hosi Ministériu Obras Públikas sei hala’o demulisaun ka sobu uma ou fatin afeitadu sira iha tempu badak”, katak nia. (Editór, Caleri).

Pin It

Follow us on Twitter

Sign up via our free email subscription service to receive notifications when new information is available.