Díli-SMI: Sekretariu Estadu Joventude no Disportu – SEJD, Abrão Nokosiku Saldanha, hatete, Governu tau esperansa ba foinsa’e timoroan hanesan membru Parlamentu Foinsa’e Timor-Leste -PFTL tenke kuda prinsipiu nu’udar ajente transformador iha sosiadade hodi kontribui ba prosesu konstrusaun nasaun no Estadu liu-hosi atividade konstrutivu sira.
“Ita nia esperansa atu sira (membru Parlamentu Foinsa’e Timor-Leste) Foinsa’e sai ajente transformador iha sosiedade, no bele sai kuadru futuru rai ida-ne’e”, dehan, SEJD, Abrão Saldanha, iha Palásiu Nobre Lahane, Tersa, (24/08).
Foinsa’e sira tenke adapta an tuir evolusaun mundu nian ho vizaun dook hodi nune’e bele kapasita an di’ak liu-tan liu-hosi edukasaun formal no naun formal atu nune’e bele ajuda Governu no Estadu hodi had’a povu nia moris iha futuru.
Tanba, tuir Abrão, kontinuasaun hosi ukun-an ne’e sai nu’udar reponsabilidade foinsa’e ka joventude hodi kontinua luta ba moris di’ak povu nian.
Iha parte seluk, Kordenador PFTL, Andre José Sarmento, esplika, durante semana ida ona membru foun PFTL halo atividade formasaun hodi hasa’e abilidade kona-ba debate, public Speaking nomós pratika enkontru bankada, komisaun no plenaria nian.
“Antes ne’e mós ami liu ona atividade lubuk ida durante semana ida nia laran, hahú husi formasaun, tekniku debate, public speaking, depois mós kontinua kedas ho enkonntru bankada, kontinua enkontru komisaun no ate ohin loron mak plenaria”, katak Andre Sarmento.
Atividade plenaria hosi membru PFTL ne’e ho intensaun atu halo diskusaun ba asuntu sira ne’ebé sai preokupasaun ba povu iha teritóriu laran durante ne’e.
“Atividade plenaria da-huluk ba membru parlamentu foin sa’e – PFN periodu 2019-2022. objetivu hosi atividade ida-ne’e atu halo diskusaun kona-ba problema sira ne’ebe indentifika iha postu sira timor laran tomak”, tenik nia. (Editór, Caleri).
