Díli-SMI: Akademiku hosi Universidade da Paz – UNPAZ, Zeferino Almeida Martins, krítika viajen Prezidente Parlamentu Nasional – PPN, Guterres, ne’ebé ohin, Sesta, (03/09) ho ninia ekipa dezloka ba Austria atu partisipa konferénsia mundiál kona-ba Uniaun Inter-parlamentár – UIP tanba konsidera la-nesesáriu liga ho situasaun atúal ne’ebé implementa hela Konfinamentu Obrigatóriu ba sidadaun hotu iha rai-laran.
“Viajen PPN ba Austria kona-ba konferénsia Inter-Parlamentar ho asuntu luta hasoru terorizmu, pesoál konsidera katak viajen ida-ne'e tuir loloos la nesesáriu ba viajen refere tamba la kondiz ho situasaun atúal ne'ebé ohin loron Timor-Leste infrenta.
“Timor-Leste ohin loron hasoru hela situasuan pandémia COVID-19 ne'ebé mak governu rasik estabelesse hela konfinamentu domisiliáriu jeral iha pais ida-ne'e. Viajen refere sei hamosu duvida boot iha sosiadade tanba Governu sulan povu labele halo viazen ba munisípiu maibe ukun-na’in sira bele semo ba estranjeiru”, dehan, Zeferino Almeida, ba SMI iha UNPAZ, Sexta, (03/09).
Estudante Fakuldade Censia Sosiál Humaniora – CSH hosi UNPAZ ne’e konsidera dezlokasaun PPN, Aniceto Longuinhos Guterres, ho nia komitiva ba Australia nu’udar traisaun ida ba desizaun Konsellu Ministru iha loron 01 Setembru 2021 hodi deside estensaun KO iha munisípiu Díli hodi bandu komunidade labele halo viajen ba munisípiu seluk.
“Ba viajen ne’e, ha’u konsidera Prezidente Parlamentu Nasional halo traisaun ba dezisaun Konsellu Ministru relasiona ho implementasaun konfinamentu domisiliáriu jeral tamba movimentasaun nasional la la’o obriga ema hotu tenke hela iha uma, tantu ba ema sira ne'ebé vazina ona dala rua tenke hela uma, maibe PPN foti dezisaun halo viajem ba estrajeiru”, Martins, halo kontesta.
Tuir nia, PPN ho ninia ekipa labele halo viajen ofisiál ba estranjeiru hodi gasta orsamentu boot iha situasaun ne’ebé povu hasoru hela susar ho rendementu ekonómia tanba impaktu hosi pandémia COVID-19 ne’e.
Antes ne’e, iha Kinta, (02/09), Vise II PPN, Luis Roberto da Silva, viajen PPN ho ninia ekipa konfrima ona ohin (03/09) atu halo viajen ba Austria hodi partisipa konferénsia mundiál parlamentar nian.
“Viajen Prezidente Parlamentu Nasional ba Austria ne’e inklui mós ha’u. Ekipa ne’ebé atu halo viajen ne’e mós durante ne’e tuir teste swab ho rutina”, dehan, Luis da Silva.
Luis Roberto, informa, reprezentante PN Timor-Leste ne’ebé hetan konvite hosi IPU hodi partisipa konferénsia mundial parlamentar iha Austria ne’e sei hela iha estranjeiru durante loron 11 nia laran.
Kompozisaun ekipa ne’ebé dezloka ba Austria hamutuk ema na’in 3 mak hanesan PPN, Aniceto Guterres, Segundu Vise PPN, Luis Roberto da Silva no Antonio da Conçeicão, parte bankada opozisaun nian. (Editór, Caleri).
