Díli-SMI: Reuniaun Konsellu Ministru – KM, Kuarta, (08/09) deside hapara ona implementasaun Konfinamentu Obrigatóriu Jerál iha munisípiu Díli hafoin rona no analize ba aprezentasaun hosi pontu epidemiolójiku hosi Sala Situasaun – Sentru Integradu Jestaun Krize – SS-SIJK.
“Reuniaun Konsellu Ministru nian kuarta ohin, deside hakotu impozisaun Konfinamentu Obrigatóriu Jerál (lockdown) ba populasaun iha Munisípiu Dili nian.
“Hahú hosi tuku 23:59 OTL iha loron 9 fulan-setembru tinan 2021; hafoin halo análize ba aprezentasaun husi pontu situasaun epidemiolójika país nian, husi koordenadór sira Sala Situasaun-Sentru Integradu Jestaun Krize (SS-SIJK) nian”, dehan, Komunikadu Imprensa ne’ebé fó sai hosi Palásiu Governu, (Kuarta, (08/09).
Maske hakotu ona KO jerál iha kapitál Díli maibe kontinua mantein ho Serka Sanitariu – SS semana rua tan ne’ebé aplika mós ba munisípiu tolu (3) mak hanesan Baucau, Ermera no Covalima.
“Mantein impozisaun serka sanitária iha Munisípiu Baucau, Ermera Dili, no Kovalima, to’o loron 22 fulan-setembru tinan 2021”, esplika, Komunikadu ne’e.
Parte seluk, liu-hosi reuniaun KM ne’e mós deside hodi la-kontinua aplika SS iha Rejiaun Administrasaun Espesiál Oecusse Ambeno – RAEOA.
Desizaun hakotu impozisaun SS ne’e abranje ba Postu Administrasaun rua iha Oecusse mak hanesan Postu Administrativu Pante Makasar no Postu Administrativu Oesilo.
“Hakotu impozisaun serka sanitária iha area sira ne’ebé abranja hosi suku Naimeko, postu administrativu Pante Makassar, no husi suku Bobometo, postu administrativu Oesilu, suku rua ne’e iha Rejiaun Administrativa Espesiál Oekusi Ambenu nian, to’o tuku 23:59, husi loron 8 fulan-setembru tinan 2021”, katak, komunikadu.
Maske nune’e, KM kontinua mantein ho desizaun aplikasaun SS iha munisípiu Manufahi to’o semana oin, loron 15 Setembru 2021, tanba laiha alterasaun.
Ho nune’e, hosi rezultadu reuniaun KM ne’e kontinua nafatin bandu ema tama no sai ba munisípiu sira ne’ebé implementa hela SS.
Maibe, bele konsidera ka fó autorizasaun tama no sai ba sidadaun sira hosi munisípiu sira ne’ebé hetan SS wainhira iha razaun sira ne’ebé liga ho seguransa públiku, saúde públiku, asisténsia sosiál no seluk tan.
“Munisipiu sira ne'ebe sei implementa Serka Sanitaria, bandu nafatin ema tama no sai husi munisípiu sira refere, exetu tanba razaun sira seguransa públika, saúde públika, asisténsia umanitária, manutensaun ba sistema abastesimentu públiku ka razaun seluk ne’ebé presiza atu hala’o ba interese públiku nian”, tenik, komunikadu ne’e.
Maske nune’e bandu ka limite ne’e la aplika ba sidadaun sira ne’ebé komprova hetan ona vasinasaun kompleta (doze dahruak) kontra pandémia COVID-19, inklui labarik sira hosi tinan 0 – 6 livre wainhira hala’o viazen ho indivídu hirak ne’e. (Editór, Caleri).
