Manufahi-SMI: Komunidade ida hosi Aldeia Riatu, Suku Daisua, Postu Administrativu Same, Munisípiu Manufahi, hetan tolok no baku to’o ran hosi membru Polísia Nasional Timor-Leste – PNTL tanba la-uza maskára durante implementasaun Serka Sanitariu, foin lalais ne’e.
“Wanhira (ha’u) tuun hosi Anguna Polísia ida husi Unidade Tranzito bolu ha’u dehan “heii Karalho tamba sa la uza maskára”. Ha’u hatan la hatene informasaun ida no hau la iha orsan atu sosa maskára tamba ami dok hosi vila.
“Maibe agora ha’u bele ba sosa maskára maske orsan laiha ha’u tenke kumpri regras. Wainhira ha’u hatan hanesan ne’e, polísia ne’e mai tuku direta ha’u ibun to’o ran”, dehan, Albano Corte Real, wainhira hato’o keixa ba parte PDHJ iha Postu Administrativu Same, semana kotuk liu-ba.
Kronólojia akontesementu ne’e iha parte dadersan (08:30) Albano viazen hosi ninia aldeia Riatu mai Same Villa atu sosa aimoruk ba ninia tiun ne’ebé moras hela.
No, nia rasik laiha informasaun ka la-hatene informasaun kona-ba implementasaun SS iha Munisípiu Manufahi, nune’e la-uza maskára maibe wainhira to’o iha merkadu same tun hosi Anguna hetan baku hosi polísia tranzitu to’o ibun ran.
“Ha’u sai hosi Aldeia Riatu, Suku Daisua ba iha Merkadu Same iha oras tuku 08:30 atu sosa aimoruk ba nia tiu ne’ebé moras hela. Ha’u lahatene informasaun kona-ba Munisípiu Manufahi Implementa Serka Sanitaria tamba ne’e ha’u la-uza maskára”, tenik, Albano.
Parte PDHJ konsidera aktu membru polísia ne’e la profísional no hatudu hahalok diskriminasaun tanba komunidade barak mak la-uza maskára hodi la’o livre iha merkadu maibe sira nonok de’it, la-halo asaun ruma.
“PDHJ nota katak intervensaun membru polísia kontrariu fali ka hamosu diskriminiasaun katak komunidade balun mos la-uza maskra la’o hela iha polísia nia oin maibe polísia la halo atuasaun ka hetan tolok hosi polísia hanesan vitima (Albano)”, katak relatóriu ekipa PDHJ Manufahi nian.
Iha parte seluk, liu-hosi reuniaun Konsellu Ministru, Kuarta-feira, (08/09) deside kontinua impozisaun SS iha Munisípiu Manufahi to’o loron 15 Setembru 2021. (Editór, Caleri).
