Batugade-SMI: Instituisaun Polisia Nasional Timor-Leste – PNTL liu-hosi serbisu Unidade Patrollamentu – UPF hamutuk Falintil Forsa Defexa Timor-Leste – F-FDTL, durante loron finadu (2/11) kaptura sidadaun timoroan hamutuk ema na’in 2 ne’ebé hakat ilegál hosi Indonézia hodi tama mai Timor-Leste.
“(Foin lalais ne’e) ita-nia membru sekreta hosi Kuartel UPF hamutuk ho F-FDTL ne'ebe destaka iha fronteira kaptura joven mane na’in 2 ho inisial ICS no JNC iha Palaka área Bemalae ho Bero ne’ebé ultrapasa fronteira ilegalmente hosi Indonézia mai teritoriu nasionál”, dehan, Komandante UPF, Superintendente, Euclides Belo, liu-hosi komunikadu foin lalais ne’e.
Euclides, esplika, timoroan na’in rua ne’ebé hetan kapturasaun ne’e entrega ona ba eskuadra PNTL Atabae, munisípiu Bobonaro hodi halo identifikasaun antes entrega ba parte ekipa COVID-19 atu halo teste hodi kontinua submeter ba kuarentena tuir lei haruka.
“Timoroan na’in 2 ne’e entrega ona ba eskuadra PNTL Atabae hodi halo identifikasaun no sei entrega ba ekipa saúde COVID-19 hodi halo teste ba sira-nia saúde no sei submete ba kuarentena durante loron 14 nia laran”, tenik, Euclides.
Tuir rezultadu inkeretu katak timoroan mane na’in rua tama Atambua-Indonézia iha fulan lima (5) liu-ba hodi tuir atividade hasae sintu organizasaun artemarsial nian.
“Tuir sira nia deklarasaun katak sira ba sa'e sintu iha Atambua-Indonezia iha loron 9 juñu 2021 tuir dalan ilegal hosi area Bemalae Palaka ho Ró Ai hamutuk ho ema nain 12 maibe nain 10 hetan ona kapturasaun iha fulan kotuk liu ba", katak, eis Adjuntu Komandante PNTL Munsípiu Díli ne’e.
Iha loron hanesan (2 Novembru 2021) UPF Postu Sakato, kaptura mós sidadaun timoroan na’in ida (1) ho naran inisial FT, tinan 35, hosi Leolbatan, Suku Costa, Sub-Rejiaun Pante Makassar, tanba tama ilegal hosi Kalimantan-Indonezia RAEOA.
Sidadaun timor oan ne’e tama ba Indonezia liu dalan ilegal iha tinan 2003 ho objetivu hodi servisu iha DEPNAKER (Departemen Tenaga Kerja), Kelapa Sawit iha Kalimantan, hafoin desidi fila hikas mai Timor-Leste no hetan kapturasaun iha área Sakato nian. (Editór, Caleri).
