Óe-Cusse-SMI: JU,S Jurídico Social Consultoria liu-hosi komunikadu imprensa deklara katak bazeia ba gravidade krime ne’ebé eis padre Richard Daschbach komete tuir loloos simu kastigu ka pena prizaun másimu durante tinan 30, tuir lei iha Timor-Leste.
Relasiona ho desizaun tribunal Óe-Cusse ne’ebé ladun todan, vítima sira husu JU,S atu halo rekursu fila fali ba tribunal hodi nune’e eis padre Daschbach bele hetan kastigu todan tuir gravidade krime ne’ebé nia komete.
“Tuir loloos, haree ba gravidade krime, arguidu devia simu kastigu másimu tuir lei iha Timor-Leste: tinan 30 iha prizaun. Ho nune’e, vítima sira la konkorda ho kastigu ne’ebé Tribunál fó ba arguidu, no sei halo rekursu”, dehan, Komunikadu Imprensa ne’ebé JU,S fó sai, Tersa, (21/12).
JU,S konsidera tribunal Óe-Cusse ninia desizaun sentensa tinan 12 ba eis padre Amerikanu ne’e la-todan hanesan konsekuensia terus ne’ebé vítima sente iha moris tomak.
“Kondenasaun ba arguidu sei la hamate terus no sei la halakon fitar ne’ebé vítima sira sente ba sira-nia moris tomak. Kondenasaun no kastigu mós sei la fó fila labarik no joven feto sira-nia moris hodi haksolok, hamnasa no halimar.
“JU,S Jurídico Social, ne’ebé reprezenta vítima na’in 9 iha kazu ida-ne’e, lori vítima nia naran hodi deklara katak: mezmuké Tribunál kondena arguidu, ho kastigu prizaun tinan 12 la refleta gravidade hosi krime no prátika hosi Tribunál”, esplika iha komunikadu.
Maske nune’e, JU,S ne’ebé durante ne’e reprezenta vítima iha prosesu justisa tomak apresia ba entidade tomak ne’ebé durante ne’e fó apoiu to’o termina prosesu refere.
Tuir JU,S, kazu pedofilia ne’ebé Richard Daschbach komete nu’udar kazu violénsia seksual boot liu iha istória Timor-Leste hafoin ukun-an.
“Mezmu ami la haksolok ho desizaun ida-ne’e, ami, ne’ebé reprezenta vítima, nafatin apresia esforsu hosi entidade hotu ne’ebé konsege termina prosesu ida-ne’e.
“Kazu ida-ne’e hanesan kazu violénsia seksuál boot liu ne’ebé registu iha Tribunál iha Timor-Leste tomak, haree ba númeru vítima no haree ba akontese iha tempu naruuk nia laran”, katak komunikadu.
Apezárde kastigu la todan, desizaun hosi Tribunál ohin loron hatudu katak arguidu sala duni. Arguidu komete duni krime lubuk ida hasoru labarik-feto ne’ebé iha ninia mahon.
Tribunál Distritál Óe-Cusse foti desizaun kastigu tinan 12 arguidu tanba halo krime abuzu seksuál hasoru labarik-feto na’in 4 iha orfonatu Topu Honis, ho vitima 2 nia krime preskreve ona.
Eis misionariu Amerikanu ne’e uza ninia influénsia nu’udar Diretór orfanatu, ninia pozisaun nu’udar Padre no aproveita vulnerabilidade komunidade lokál hodi halo abuzu seksuál ba labarik ne’ebé nia tau-matan bá.
Antes hetan desizaun pena prizaun tinan 12 hosi tribunal Distrital Óe-Cusse, kondenadu ne’ebé uluk padre ne’e hetan ona demisaun hosi Igreja Katólika tanba aktu pedofilia. (Editór, Rui Santos).
