Laivai-SMI: Governu liu-hosi Ministériu Agrikultura no Peskas – MAP rekuiñese katak Postu Antigu Laivai ne’ebé kompostu hosi suku Eukisi, Barliu, Ililai no Wairoke nu’udar área ne’ebé pontensial tebes ba produsaun haré hodi responde ba konsumu nasionál iha rai-laran.
“Área ida-ne'e (Laivai) nia potensial bo'ot tebes iha rai ektares atus rua, 200 maibe koilleta ne'e representa 70-80 ektares ba iha haré ne’ebé mak kuda.
“Objetivu halo lansamentu Koilleta haré jéral ne'e atu fó motivasaun agrikultór sira, tanba MAP, mantein nia politika hasa’e produtividade ba ai-han Agrikultura ninian”, dehan, Diretóra Jerál Agrikultura MAP, Maria Odete do Ceú Guterres, wainhira hala’o lansamentu koilleta haré, iha Suku Eukisi, Postu Antigu Laivai, fulan kotuk liu-ba.
Nune’e, Governu presiza halo planu hodi koloka orsamentu iha Orsamentu Jerál Estadu – OJE tinan 2023 atu bele hadi’a irigasaun hirak ne’ebé at ona hodi impede agrikultór sira halo atividade agrikula nian.
“Problema ne’ebé komunidade sira preokupa mak irrigasaun ho nune’e governu rasik liu hosi fundus infra-estrutura iha ona hanoin atu halo estudu, nune’e tinan oin bele rekomenda hodi hatama iha Orsamentu Jerál Estadu – OJE”, Maria do Ceú Guterres, esplika.
Programa Governu kontinua hasa’e produsaun iha rai-laran hanesan haré no prodútu lokál atu bele responde ba polítika implementasaun Cesta Básica no Merenda Eskolar ne’ebé deside ona katak 75% tenke mai hosi prodútul lokál.
“Governu iha papel laos atu hasa’e de’it, produsaun haré, produsaun batar, no mós produtus hanesan Fehuk, Talas, ai-farina, no legumes, forerai, forekeli, foremungu, no mós haré posibilidade atu hasa’e produsaun ortikultura hanesan modo, tomate.
Maibé Governu iha papel polítika ba implementasaun Cesta Basica 75% tenke ho produtu lokál nune’e mós merenda eskolar ho konsumu nasionál Timor-Leste nian”, do Ceú, tenik.
Área Postu Antigu Laivai ne’e nu’udar rai produtivu ba agrikultura maibe problema irigasaun ne’ebé ladun hetan atensaun hosi Governu sentral hafoin ukun-an, prejudika agrikultór sira atu halo atividade agrikula hanesan kuda haré nian.
“Ami iha vontade tomak hodi servisu, maibé Problema durante hasoru ne’e mak irigasaun, ami hato'o ona ba MAP Nasional no Munisípiu atu ba oin bele atende ami nia nesesidade ne’ebé ami hasoru iha baze,” dehan, Luis da Costa Guterres, agrikultór ka natar-na’in hosi Suku Eukisi, Postu Antigu Laivai.
Postu Antigu Laivai dadaun ne’e tama iha Postu Administrativu Lautém ne’ebé iha tinan 2021 atu sai postu foun hamutuk ho Postu Lore 2 maibe hetan pondera hosi Konsellu Ministru. (Editór, Caleri).
