Batugade-SMI: Dezde nasaun ne’e ukun-an, atividade negósiu ilegál iha fronteira Timor-Leste ho Repúblika Indonézia aumenta ba bebeik no parte Polísia Nasional Timor-Leste – PNTL liu-hosi Unidade Patrullamentu Fronteira – UPF kaptura bebeik maibe kontinua laiha solusaun.
Liu-hosi Servisu Seksaun Sekreta PNTL-UPF halo vizilánsia no kontrolu iha área fronteira, konsege kaptura sidadaun timor-oan feto na’in-4 ne’ebé halo transaksaun ilegál ba kombusivel iha area Mota-Ain fronteira entre Timor-Leste ho Indonézia.
“Atu informa katak iha oras tuku sia kalan ita-nia membru Servisu Sekreta halo kapturasaun ba ita-nia sidadaun feto nain-4 ne'ebé mak komete krime.
“(Sira halo) transaksaun ilegál hosi Atambua mai Timor-Leste ba konbustivel tipu Gazolina jerigen 20ltr hamutuk 29 no 5ltr iha 7, no sira halo kapturasaun iha area TCL 12 Suku Batugade”, dehan, Komandante UPF, Superintendente Polísia, Euclides Belo, Kurta, (13/07), iha Fronteita-Batugade.
Hafoin kaptura ba sidadaun na’in hat (4) ne’e, parte UPF halo identifikasaun no termu entregra ba eskuadra Batugade atu halo prosesu formal hasoru sira.
Sidadaun Timor-Leste na’in hat ne’e hosi suku Batugade no suku Leohitu ne’ebé rezidente atúal iha mota-ain no ida seluk hosi suku Dolaus, Atambua – NTT.
"Iha prosesu identifikasaun ne'e ita identifika sidadaun feto nain 4 ho inisiál, CM tinan 50, husi Aldeia Lotan, Suku Leohitu maibé hela iha Mota-Ain, Suku Batugade, ALP, tinan 18, hosi Aldeia Leohitu, Suku Leohitu no hela iha Mota Ain.
“Enkuantu iha mós sidadaun feto nain rua ne’ebé halo kazamentu mista ho timor-oan mak YMB, sidadaun Indonézia, tinan 31 hosi Suku Dolaus, Atambua-NTT, no AV sidadaun Indonézia, tinan 31 husi Suku Salore, Atambua-NTT”, relata, Euclides Belo.
Relasiona ho negósiu ilegál iha fronteira ne’ebé kontinua buras, Diretúr HAK, Xisto dos Santos, esplika, atu evita atividade negósiu ilegál iha fronteira mak presiza implementa rekomendasaun Komisaun Verdade no Amizade – KVA ne’ebé husu atu instala merkadu popular iha liña fronteira hodi fasilita komunidade rai rua ne’e bele halo atividade negósiu ho dala-legál.
“Tuir Komisaun Verdade no Amizade – KVA ne’ebé estabelese iha 2005-2008 rekomenda ba TL-RI hodi husu Estadu rua atu instala merkadu popular zona dame iha área fronteira hodi fasilita komunidade sira iha area fronteira entre TL ho RI.
“Infelizmente to’o mai agora Estadu rua sidauk konkretiza nia obrigasaun nune'e komunidade sira mak tenke hahú rasik tuir sira nia kbit ho dalan ne’ebé sira opta”, Xisto, dehan.
Mosu duvida mak Konsuladu Timor-Leste iha Kupang – Indonézia mós laiha vontade atu bele insía diskusaun ho autoridade Indonézia hodi bele buka solusaun ba atividade negósiu komunidade rai rua iha fronteira trestre.
“Tansa Konsuladu TL nian iha Kupaun laiha agenda ruma hodi diskute ho Embaisada Indonézia ho autoridade sira hodi buka meius ba apoiu komunidade sira nebe mak hela iha area fronteira?”, Xisto, husu pergunta. (Editór, Guido Santos).
