Díli-SMI: Primeiru Ministru no Ministru Interior, Jose Maria Vasconselhos alias Taur Matan Ruak – TMR, planeia atu reforma membru Polisia Nasional Timor-Leste – PNTL ne’ebé idade mais avansadu ona atu deskansa iha uma hodi fó tempu fali ba joven sira.
Intensaun hosi líder Governu ne’e atu halo transformasaun ba instituisaun hodi nune’e ba futuru labele hamosu problema iha instituisaun polisial refere.
“Ha’u nia prioridade mak ne’e ema (polisia) ne’ebé 60 anos tenke ba deskansa, entaun tenke halo alterasaun lei para sira 60-anos deskansa para joven sira sa’e-troka.
“Se lae ita katuas hotu la’o hotu la di’ak, hanoin mós la la’o ona, orsida problema boot ne’e, joven sira fatin la iha ne’e”, dehan, Ministru Interior, Taur Matan Ruak, Kinta, (11/08), iha Díli.
Relasaun ho intensaun atu reforma uluk membru PNTL ne’ebé ho idade idozus (katuas) mak nia deside kansela rekrutamentu ba membru PNTL ne’ebé tuir planeia atu hala’o rekrutamentu tinan ne’e.
Nune’e mós kestaun ekonómia rai-laran ne’ebé la’o ladun di’ak sai fatór importante ba nia desizaun halo kanselamentu ba rekrutamentu membru PNTL tinan ne’e.
“Ha’u kansela! Tanba saida, tanba dezenvolvimentu instuitusaun hotu-hotu inklui PNTL tenke tau matan mós ba ita-nia ekonomia, se hahán uitoan, ita hatama ema barak, ne’e kualidade laiha, hahán la to’o ita problema”, katak nia.
Razaun seluk mak TMR hakarak rekrutamentu ka aumenta númeru membru polísia presiza tuir planu no nesesidade seguransa rai-laran nian.
“Ita-boot sira haree kuandu ha’u Jenerál, ha’u nia planu mak ida ne’e, F-FDTL só iha tinan 20 liu mak atinje 3 mil, tinan 20 liu dezde 2001 to’o 2022 mak foin 2600, PNTL sa’e tiha ba 4 mil, depois hakarak aumenta osan, aumenta hahán, ema mesak sira de’it ka, be kiak sira iha foho ne’e ita halo nusa?
“Rekrutamentu PNTL no F-FDTL aumenta mós tenke haree ba ameasa de risku, ita labele hatama ema, hatama ema depois ba han de’it, ezije saláriu de’it, ba tuur iha kazerna, labele, tenke serbisu, entaun ha’u dehan ba sira, enkuantu ha’u mak Ministru Interior, ha’u mak Primeiru-Ministru, PNTL ninia rekrutamentu laiha”, nia dehan. (Editor, Caleri).
