Díli-SMI: Esforsu Governu no Estadu atu lori nasaun Timor-Leste adere ba organizasaun ASEAN hatudu ona sinal pozitivu tanba posibilidade boot prosesu adezaun TL ba ASEAN sei akontese iha tinan 2023.
Asaun justifikasaun ida konkretu mak liu-hosi reuniaun bad ala 55 entre Ministru sira Negósiu Estranjeiru ASEAN foin lalais his Kombodia konsege hasai komunikadu kona-ba dispozisaun ASEAN nian ba prosesu adezaun TL iha 2023.
Tanba ASEAN satisfeitu ho rezultadu ekipa hosi misaun Fact Finding Mission hosi pilar sósiu kultural no pilar ekonómiku iha tinan 2022 foin lalais ne’e.
Liga ho informasaun pozitivu kona-ba TL nia adezaun tinan 2023 halo líder Governu sente kontente tanba nasaun sira ne’ebé sai membru ASEAN bele simu pedidu TL atu tama organizasaun ASEAN refere.
“Ha’u rona notísia di’ak loos, katak ita iha kondisoins para tama iha tinan oin, Ministru Singapura foin daudaun mai hasoru ha’u, ha’u mak husu ba nia. Ita-boot nia rai mak lakohi ami atu tama, nia dehan lae, ami ajuda imi.
“Ha’u espera sira hotu konsensu, porque ne’e konsensu sira hotu bele ajuda Timor-Leste tama, mas Timor-Leste la husu favór”, dehan, Primeriu Ministru, Taur Matan Ruak, iha Palasiu Governu, foin lalais ne’e.
Informasaun adezaun ba ASEAN tinan 2023 ne’e Xefe VIII Governu, Taur Matan Ruak, konfirma direta ho delegasaun ASEAN ne’ebé mai Timor-Leste foina lalais ne’e.
“Ha’u hanesan Primeiru-Ministru kuandu delegasaun mai, ha’u husu, imi hakarak ami tama ka lae? Se imi hakarak prepara buat ruma mai ami, se imi lakohi hateten, ami bele prepara 20 anos da aqui mós di’ak.
“Mas ha’u kontente loos finalmente simu notísia di’ak katak tinan oin posibilidade Timor-Leste bele tama, ha’u espera tinan oin”, esplika Xefe Governu.
Maske nune’e, Xefe Governu Timorense mós husu ba ASEAN atu labele avalia Timor-Leste nia baze programa País sira ne’ebé ukun an tinan 40-50 ba leten.
Tanba imposivel Timor-Leste ne’ebé foin ukun an tinan 20 atu hanesan ho País sira ukun an tinan 40 ka 50 ba leten.
Disponibilidade TL tama ASEAN iha tinan oin, tanba membru sira hosi nasaun ASEAN nian satisfeitu ho rezultadu ekipa hosi misaun Fact Finding Mission hosi pilar sósiu kultural no pilar ekonómiku iha tinan 2022 liu-ba. (Editór, Rui Santos).
