Díli-SMI: Estadus Unidus Amérika – EUA liu-hosi ajénsia United States Agency for International Development – USAID apoiu tan fundu hamutuk $600.000 USD ba Governu Timor-Leste liu-hosi Ministériu Saúde – MS atu kombate COVID-19 iha rai-laran.
Apoiu EUA iha área saúde ne’e la’os foin dahuluk maibe hanesan apoiu hosi duador seluk ne’ebé durante ajuda Timor-Leste iha seitor oi-oin.
“Ha'u hakarak atu hato'o katak apoiu sira hanesan ne'e la'os apoiu ida ne'ebé mak primeira vez maibé apoiu husi parseriu oinoin, hosi duadór oinoin no ohin atualmente ita iha apoiu seluk hosi Povu Amérikanu, liuhosi ninia Embaixadór Tom Deley, liuhosi ninia Ajénsia USAID nian ne'ebé mak iha ne'e.
“(Agora) sira apoiu ita ho osan adisionál seluk ho $ 600.000 dólares, ida-ne'e la'os primeira maibé apoiu ida-ne'e sira fó primeiru ona ho montante millaun ida." Dehan, Ministra Saúde, dr Odete Maria Freitas Belo, iha Palásiu da Cinzas, foin lalais ne’e.
Parte MS identifika katak surtu COVID – 19 ne’ebé hahú ataka Timor-Leste iha tinan 2020 ne’e seidauk lakon no kontinua ejizte iha rai-laran, nune’e presiza kontinua prepara an atu kombate liuhosi apoiu duador sira.
"Ha'u hakarak atu informa nafatin katak surtu covid-19 ne'e seidauk remata, sei moris hela ho ita iha ne'e i to'o tempu ida nia bele iha fali outbreak ida ne'ebé mak ita la espera, entaun ita labele hein katak outbreak ida-ne'e mosu mak ita serbísu, ita buka dalan, ita buka osan, la'e”, katak Odete Belo.
Ministériu Saúde nafatin nakloke ba parseiru sira, duadór sira atu garante sustentabilidade sistema saúde iha Timor-Leste.
To’o ohin loron, Timor-Leste atinji ona vasina doze dahuluk 87% no doze daruak 67% no Governu kontinua esforsu hodi aumenta taxa kobertura ba doze daruak nian.
“(Ita) Timor-Leste atinji ona vasina doze dahuluk 87% no doze daruak 67% no espera bele hasa'e taxa kobertura doze daruak ba 77% no apoiu ne'ebé iha sei uza ba atividade vasinasaun hanesan pesoál sira iha munisípiu atu nune'e ajuda sira bele fó nafatin vasina liuliu ba sira ne'ebé vulnerável ga difisiente sira ne'ebé mak labele hakbesik-an bá iha fasilidade saúde”, nia tenik.
Relasiona ho apoiu fundu ne’e, Governu liuhosi MS sei nafatin buka parseiru sira atu hadi’a di’ak liu-tan sistema saúde iha nasaun ida-ne’e. Nune’e mós sei garante utilizasaun apoiu fundu sira hosi duador sira ho transparansia no akuntavel. (Editór, Zé Amaral).
