Balibar-SMI: Joven feto ida ho naran Agostinha Jose Pereiea Neves, sai vítima tanba hetan sona ho dima iha hasan hosi ema deskuiñesidu iha Balibar, aldeia Raikuak, Suku Lahane Osidental, Postu Administrativu Vera-Cruz, Munisípiu Díli.
Vítima Agostinha deklara, durante ne’e laiha konflitu ruma ho ema seluk maibe derepente de’it hetan ataka iha dadersan madrugada maizumenus tuku 2 hosi ema deskuiñesidu sira ne’e.
“Durante ne’e ha’u laiha inimigu ho ema se deit tanba hanoin deit mak ha’unia servisu. “Hau servisu cleaner iha hotel Bidau ema sira ne’e ami ladun kuiñese.
“Ha’u haree mane isin badak ida hakilar sona tama besi meik mai ha’u nia oin ne’e nia lian ha’u deskunfia ami nia vizinha maibe hau lakoi dun ema”, dehan, Agostinha, iha Balibar, foin lalais ne’e.
Nu’udar vítima, feto ho idade 28 ne’e husu ba komandau PNTL atu buka tuir suspeitu sira ne’ebé ataka nia hodi sona kanek nia hasan ho dima inklui harahun komunidade balun nia uma.
Ho asaltu ema deskuiñesidu sira ne’e halo nia iha situasaun trauma nian laran
“Kondena hahalok krime ne’ebé akontese no husu PNTL buka tuir suspeitu hirak ne’ebé envolve iha kazu refere nune’e ami labele moris iha trauma nia laran”, dehan, nia.
Parte seluk, Wilson Jose Pereira Neves, hanesan mós vítima hosi asaltu ne’e konsidera hahalok ema deskuiñesidu sira nu’udar aktu tentativa homesidu tanba asaltu sira iha iha kalan madrugada.
Tuir kronolojia akontesementu katak Wislson ho ninia família tur iha uma laran mak ema deskuiñesidu sira ne’e halo asaun asaltu derepente tuda uma no baku rahun uma.
“Ami hamutuk ho família toba hotu hela derepente ema komesa tuda fatuk ba uma leten no hakilar dehan “ne’e sete-sete imi halimar imi mate. Rona ida ne’e ami sente tauk hodi nonok deit iha uma laran no ha’u rasik telefone ba polísia husu ajuda.
“Maibe lakleur deit iha oras tuku rua resin sira komesa mai besik falun oin ho sira nia faru uza sasan kroat baku mate ahi oan iha ferik katuas nia rate oin. No kontinua uza besi meik baku rahun vidru janela 3 hodi kona Atina nia oin no sira sona diman iha odamatan vidru rahun hotu sorte maun sira polisia mai lalais selae sira tenta atu oho ami iha uma laran”, haktuir, Wilson.
Liga ho akontesementu refere, ekipa konjunta Servisu Informasaun Polísia Nasionál (SIPN-PNTL), hamutuk ho Servisu Informasaun Militár (SIM-F-FDTL) ho J2, Unidade Informasaun Falintil, S2 hodi buka tuir autor sira ne’ebé halai lakon ne’e. (Editor, Rui Santos).
