Díli-SMI: EstaduTimor-Leste iha obrigasaun moral hodi dezenvolve instituisaun Falintil Forsa Defeza Timor-Leste – F-FDTL liu-liu komponente Naval hodi nune’e bele asegura ita nia riku-soin iha tasi tanba tasi nu’udar odamatan estratéjiku ba dezenvolvimentu nasional iha futuru oin mai.
“Haree ba tasi nuudar dezenvolvimentu estratéjiku ho kapitál makaas no mós iha potensiál jeoestratéjiku, nune’e ita presiza jere Tasi ho neon-matenek hodi fó benefísiu ba ita no ba jerasaun tuir-mai.
“Tasi nuudar odamatan ba dezenvolvimentu. Mundu agora haree ba tasi nuudar odamatan estratéjiku ida ba dezenvolvimentu no mós obstákulu ba Nasaun”, dehan, PR Horta iha ninia diskursu wainhira partisipa aniversariu Komponente Naval ba dala 21, foin lalais ne’e.
Dezde Timor-Leste hetan ninia independensia, maizumenus 90% hosi Orsamentu Jerál Estadu – OJE sustenta hosi fundu mina-rai ne’ebé iha tasi-laran.
“Ita-nia esperiénsia hatudu katak 90% hosi Orsamentu Estadu sustenta hosi fundu mina-rai neebé mai hosi tasi maibé ita seidauk iha kapasidade di’ak atu asegura tasi”, SMI sita diskursu PR Horta.
Nune’e mós Timor-Leste nia maritima ne’ebé koneksaun direta ho aseanu Indiku no Azia Pasifiku ne’ebé ho área luan, presiza tebes Estadu kria kondisaun di’ak ba komponente Naval atu bele satan riku-soin iha tasi timor.
Riku-soin iha tasi timor iha kualidade di’ak inklui mós ahu-ruin sira no ikan sira ne’ebé bele fó rendementu ba nasaun iha futuru oin mai.
“Ita-nia tasi hola parte iha koridor neebé iha koneksaun marítima ba oseanu Índiku no Ázia Pasífiku no ho rota marítima Ombai no Wetar, Ida nee ejize Estadu tenke kria kondisaun di’ak ba Komponente Navál hodi asegura tasi ho nia riku-soi sira.
“Ita-nia tasi mós hola parte iha Triángulu Korál (Coral Triangle) neebé iha kualidade bee tasi di’ak hodi prezerva ahu-ruin sira atu ikan ho espesies oi-oin moris ba, no mós di’ak atu esplora ba iha setór turismu nian”, diskursu PR Horta.
Nunee, tempu ona atu Estadu promove ekonomia tasi-nian tamba hosi tasi ita bele kria kampu-servisu barak liután ba ita-nia joven sira hodi bele responde ba númeru dezempregu ne’ebé kada tinan aumenta. (Editor, Rui Santos)
