Díli-SMI: Parlamentu Nasional Timor-Leste – PN - TL hala’o diskusaun ho parte Governu liu-hosi Ministériu Defeza no Ministeriu Interior kona-ba asuntu defeza no seguransa nasaun nian hodi garante paz no estabilidade ba povu iha nasaun ida-ne'e.
Asuntu importante ne’ebé sai ajenda ba diskusaun ka debate entre membru Governu no membru komisaun B Parlamentu Nasional mak oinsa halo análize situasaun seguransa iha territóriu nasional nian.
“Asuntu sentral ne'ebe koalia iha audensia ne'e maka parte rua tau hamutuk hanoin hodi halo diskusaun no analiza kona-ba situasaun seguransa iha territóriu nasionál”, SMI sita Komunikadu hosi Ministériu Interior, foin lalais ne’e.
Diskusaun hosi orgaun soberanu Parlamentu Nasional ho VIII Governu ne’e atu bele hetan pontu de vista ka rekomendasaun sira liga ho situasaun hakmatek, paz no estabilidae iha rai-laran.
“Parte rua tau hamutuk hanoin hodi halo diskusaun no analiza kona-ba situasaun seguransa iha territóriu nasionál nune’e bele hetan rekomendasaun husi instituisaun hirak ne’e hodi garante seguransa no estabilidade ba povu rai ida ne'e”, esplika komunikadu ne’e.
Audensia PN ho Governu ne’e lidera hosi Prezidente Komisaun B, deputadu José Agostinho Sequiera “Somotxo” ho membru sira.
Parte Governu rasik reprezenta hosi Ministru Defeza ezersisiu, Fidelis Manuel Leite Magalhães, Vise Ministru Interior, Antonio Armindo ho Xefe Casa Militar, Majór Francisco da Silva.
Enkontru ne’e hala’o iha rezidensia ofisial Prezidente Parlamentu Nasional Komisaun B iha Farol – Díli. (Editór, Guido Santos)
