Ainaro-SMI: Durante anin boot fulan Dezembru 2022 to’o Janeiru 2023 ne’ebé akontese iha territóriu laran konsege estraga uma komunidade hamutuk 192 iha suku sira ne’ebé espalla iha Postu Administrative Ainaro, Postu Administrativu Maubisse, munisipiu Ainaro.
“Dadus provizoria ekipa dezasstre naturais munisípiu Ainaro rejista ona uma Hamutuk Uma 192, No Uma 6 Hetan Estragus totál.
“Anin boot iha fulan dezembru no Janeiro Liu ba konsege estraga populasaun nia uma hamutuk 192, nebe kompostu husi suku Ainaro Villa 40, Suku Maununo 21, Suku Manutasi 57, Suku Soro 18, Suku Mau-Ulo 26, Suku Cassa 23, Suku Suru Caraic 7 no Suku Maulau Maubisse 3. Suku seluk iha Postu Hato-Udo dadus seidauk tama, Posto Hato-Builico ho Suku 3 seidauk no Suku 8 iha Maubisse dadus seidauk tama”, Adjunta Administrador Munisípiu Ainaro Rosa Olga Mendonça, ba Rádiu Komunidade Mauloko, foin lalais ne’e.
Relasiona ho dadus dezastre naturais ne’ebé parke ekipa dezastre naturais munisipiu Ainaro rekoilla sei submete ba ministériu relevante hodi nune’e bele hetan apoiu material konstrusaun ba komunidade atu harii fali sira nia hela fatin.
Maske nune’e, Adjunta Administrador munisipiu Ainaro husu ba lider komunitariu sira atu foti dadus komunidade no submeter ba parte Dirasaun Protesaun Sivil no Dezastre Naturais nian hodi nune’e komunidade bele hetan apoiu emerjensia ho lalais.
"Atu rekomenda ba Xefe Suku sira nafatin rekolla dadus mai husi ita nia populasaun ne'ebé afetadu vulneravel sira atu núne'e submete ba Postu administrativu nune'e enkamina nafatin mai iha Diresaun Protesaun Sivil e Dezastre Naturais atu bele haré apoiu emerjensia ruma ba ida-ne'e, no mós bele relata ba iha Nasional", dehan, Adjunta Rosa Olga.
Autoridade munisipiu ne’e bolu atensaun ba komunidade sira ne’ebé hetan afeita hosi dezastre naturais atu labele kontinua hela iha fatin risku sira maibe muda ba fatin seluk wainhira hetan ona apoiu hosi Governu.
"Husu ba Komunidade sira hases-an hosi dezastre hotu ne'eb'e maka ita la espera. Nune'e karik ami fó ona ajuda ruma ba iha ita-boot sira husu atu labele hela nafatin iha fatin ne'ebé risku, buka fali meus atu bele sees husi (para) dezastre mai fali labele afeita ba ita-boot sira", SMI sita entrevista hosi Rádiu Mauloko.
Impaktu hosi anin boot ne’e mós afeita ba inan-faluk ida ho naran kompletu Joana de Araújo, iha suku Liurai – Maubisse ne’ebé ninia uma hetan estragus tanba ai-hun boot tohar hodi kona-na nia uma to’o hetan estragus totál.
"Momentu ne'e iha dia 3 fulan Janeiru ne'e, iha oras tuku 06 dader, iha momentu ne'e ami sei toba maibe ami rona tarutu ona hau hader mai haree fali hare ba Ai ne'e latan hela hanesan ne'e ona, no uma ne'e mós rahun hela ona. No ami nain 4 la toba iha ne'e ami toba fali iha klaran", haktuir, faluk Joana. (Editór, Guido Santos).
