Díli-SMI: Hodi garante Diretu Umanu sidadaun nian hosi hahalok korrupasaun ne’ebé estraga públiku (povu) nia moris sai baze fundamentu ba instituisaun Provedoria Diretus Humanus no justisa – PDHJ ho Komisaun Anti Korupsaun – KAK hametin serbisu hamutuk atu tau matan ba asuntu boa-governasaun iha rai-laran.
“PDHJ konsidera korrupsaun hanesan violasaun direitu umanu maibe kona-ba kazu korrupsaun ne’e kabe ba KAK mak sei halo intervensaun no PDHJ sei haree liu ba violasaun direitu umanu no boa-governasaun nian”, dehan, Provedor, Virgílio da Silva Guterres “Lamukan” foin lalais ne’e wainhira hala’o vizita kortejia ba edifísiu KAK, Farol-Díli.
Hametin koperasaun institusional entre PDHJ – KAK ne’e nu’udar kontinuasaun hosi koperasaun dahuluk sira atu bele tau forsa hamutuk hodi defende diretu umanu sidadaun sira nian ne’ebé ligadu ho asuntu boa-governasaun nian.
“KAK hanesan instituisaun ne’ebé que sai parseiru importante, parseiru xave ba PDHJ, tanba ita ko’alia kona-ba korrupsaun ita hotu tenke konkorda katak, kualker aktu de korrupsaun ne’e violasaun direitos humanos ne’e prinsípiu báziku ida ne’ebé que ita presija haree”, Provedoria, Lamukan, hatete.
Iha instituisaun hat (4) hanesan KAK, PDHJ, CFP no IGE halo akordu kuadrilateral atu bele defende diretu sidadaun nomós funsionáriu publiku sira.
Liu-liu ba asuntu boa-governassaun, kombate korrupsaun, inspesaun no monitorizasaun ne’ebé iha relasaun ho diretu sidadaun nian.
PDHJ ho KAK hamutuk ho Inspesaun Geral Estadu (IGE) no Comissão da Função Pública (CFP) estabelese ona akordu quadrilateral hodi tau matan ba asuntu diretu umanu nian.
“Ita iha ona akordu ida quadrilateral ho instituisaun 4 mak hanesan CAC, PDHJ, CFP no IGE. Ne’ebe’ mak ita halo tiha ona ne’ebé mak atu futu ou kesi instituisaun 4 ne’e.
“Objetivu prinsipal husi akordu ne’e ida mak atu futu instituisaun 4 ne’e hodi bele halo koperasaun ida ne’ebé mak diak liu tan tantu iha polítika sira kona-ba boa governação, kombate korrupsaun, iha inspesaun no monitorizasaun, nomós atu garante direitu fundamental sidadaun sira no funsionáriu públiku sira nian”, dehan, Komisáriu KAK, Sergio Hornay.
PDHJ nuudar órgaun ida konstitusional nia iha kompetênsia atu halo medidas sira konstitusional tantu abstrata fiskalizasaun konstitusionalidade ba lakunas sira ne’ebé mosu hodi viola diretus umanus nian. (Editór, Guido Santos).
