Governu Deside Ona Leilaun Karreta Estadu Hamutuk 615

"Atividade leilaun karreta Estadu hamutuk 615 unidades ne’e atu salva guarda kondisaun beins moveis Estadu nomós fontes rekolla reseitas doméstika hodi bele sustenta Estadu atu nune’e bele iha kapasidade finanseira hodi finansia programas no atividades sira.

“Redus despesas iha kustu operasionál uzu Karreta Estadu. Purizemplu, hahú husi tinan 2002 até 2020, Governu Timor-Leste gasta ona $122 milhões ba manutensaun Karreta no $135 milhões ba sosa kombustivel. Totál kustu operasionál ba manutensaun no kombustivel hamutuk $257 milhões”, Diskursu Ministru Finansa, Rui Gomes, foin lalais ne’e.

Durante ne’e kada tinan Estadu gasta orsamentu boot ho montante liu $14 milloens ba manutensaun veikulu Estadu sira.

Hosi totál montante orsamentu liu $14 Milloens ne’e maizumenus kada loron ida gasta orsamentu $57 mill ba mina no manutensaun ba veikulu Estadu sira ne’e.

“Kada tinan, Ita gasta $14,3 milhões, ka fulan-ida Ita gasta $1,2 milhões, ka loron ida Ita gasta $57 mil ba de’it mina no manutensaun veíkulus Estadu”, dehan, Ministru Rui Gomes.

Ministériu Finansa ninia levantamentu dadus ba veikulu Estadu sira durante tinan ida tomak Governu gasta ona orsamentu hamutuk $125 Milloens hodi sosa veikulu sira hamutuk unidade 3, 415.

“Ami-nia dadus ikus kona-ba levantamentu Veíkulus Estadu husi 2019 to'o 2020, hatudu katak hahú husi tinan 2002 até 2020 Governu Timor-Leste gasta ona osan $125 milhões hodi sosa karreta Estadu foun hamutuk 3,415 unidades”, Rui, tenik.

Gastu sira ba mina no manutensaun ba veikulu Estadu sira ne’e halo orsamentu ba mákina Estadu hetok aas tebes no dezvia despesas ne’ebé tuir loloos aloka ba setór produtivu sira hodi dudu kresimentu ekonómiku.

Fasilidade karreta Estadu ne’e rasik mós la-kontribui ba kresimentu iha prestasaun servisu ba públiku, maibé infelizmente hatodan fali kapasidade finanseira Estadu nian. (Editór, Rui Santos).