Oé-Cusse-SMI: Projetu rehabilitasaun estrada ho distansia kilometru 14 hosi área suku Bobocase to’o suku Kutete monu namtate ka at hotu ona hafoin liu fulan tolu Primeiru Ministru, Taur Matan Ruak ho Prezidente Autoridade RAEOA, Arsenio Bano, lansa iha loron 27 Novembru 2022.
“Estrada reabilitasaun Bihala Suku Bobocase To’o Kutete Suku Costa ho distansia kilometru 14, lansa direitamente hosi Primeiru Ministru, Taur Matan Ruak, 27 fulan novembro 2022.
“Partisipa mós husi Ministru Asuntu Parlamentar no komunikasaun Sosial (MAPKOMS ), Francisco Jeronimo, Minitru Justisa Tiago Amaral Inklui deputadu sira hosi Komisaun (E) Trata asuntu Infraestrutura”, SMI sita públikasaun Rádiu Komunidade Atoni Lifau, Kinta, (19/01).
Estrada ne’ebé hetan rehabilitasaun ho orsamentu montante $2.623.959.80 ne’e maizumenus liu kilometru ida mak monu namtate ona hahú hosi bairru Nenum ne’ebé afeita ba komunidade nia movimentu atu asesu merkadu.
Komunidade suku Kutete, Maria Coe, klarifika, estrada ne’ebé monu namtate ona ne’e mós kompañia rehabilita la-tuir survey inisiu hamutuk ho autoridade RAEOA nian.
“Estrada ne’e hahú hosi Bihala ba to’o Toikoknaba ne’eba ne’e eksa suru hotu, maibe to’o Hane no halo saluran ne’e la to’o Nun-Ana.
“Depois ponte balun mós la nahe, uza deit gaviaun ne’e ami komunidade Kutete preokupa tebes, bainhira loos maka kompañia kontinua obra ne’e to’o Nun-Ana,” hatete, Maria Coe.
Iha parte seluk, lia-na’in suku Kutete, José Eli Oueno, agradese ba esforsu Governu RAEOA hodi hadi’a infrastrutura maibe la-sastifas ho kualidade tanba seidauk to’o tinan estrada halai namtate hotu.
“Agredese ba autoridade tamba iha tinan 2022 konsege halo ona ami nia dalan. Tamba desde ukopasaun Indonesia ami iha bairru Kutete ne’e nunka asesu ba infrestrutura. maibe hau sente triste, dalan inagura seidauk to’o tinan strada ne’e hahu at fali ona”, José Eli, tenik.
Hatan ba kestaun estrada ne’ebé namtate ne’e, Prezidente Autoridade RAEOA, Arsenio Paixão Bano hateten katak, estrada at kondisaun rai iha suku Kutete iha bee nia leten ne’ebé prejudika rai-halai hodi estraga estrada ne’ebé kompañia halo kaber ona.
Projetu estrada hosi suku Bobocase to’o suku Kutete ho valor kontrastu projetu hamutuk $ 2.623.959.80 ne’e rehabilita hosi Kompañia Lifau Indah Unipessoal Lda. (Editór, Rui Santos).
