Díli-SMI: Relasiona ho kazu Asesor Seguransa ba Prezidensia Repúblika nian, Longuinhos Monteiro, ne’ebé subar kilat ilegál iha ninia rezidensia área Loes, Postu Administrativu Maubara, Munisípiu Liquiça, sai preokupasaun ba Fundasaun Mahien – FM no husu Governu atu halo auditoria imediata ba kilat sira hosi instituisaun polísia no milítar iha rai-laran.
Intensaun hosi sosiadade sivil ne’ebé halo monitorizasaun no advokásia ba asuntu seguransa no defeza ne’e mak hodi bele kontrola di’ak liu-tan sirkulasaun arma sira hosi instituisaun polía no milítar ne’e rasik.
“Governu tenke reativa Komisaun Investigasaun Armas hodi estabelese sistema atu halo audit anual ba armas de fogo (kilat). Presiza duni audit sira ne’e atu bele determina kilat hira maka sirkula iha rai laran ho tipu no kondisaun oinsá”, SMI, sita Komunikadu Imprensa FM, foin lalais ne’e. .
Tuir FM, auditoria kilat polísia no milítar ne’e importante tebes atu bele asegura sistema ka mekanizmu uza kilat ho responsabilidade inklui bele fó sasaun ba pesoal sira ne’ebé subar kilat ilegál.
“Audit bele detekta kilat ilegál no asegura katak ema ne’ebé subar kilat ilegál hetan penalidade”, dehan, Diretúr Ezekutivu Interinu FM, Abel Amaral.
Antes ne’e, eis Komandante Jeral Polisia Nasional Timor-Leste – PNTL, Longuinhos Monteiro, indetifikadu hosi autoridade seguransa subar kilat boot no kiik inklui munisões lubuk ida iha ninia rezidénsia.
Nune’e, liu-hosi autoridade seguransa ne’ebé kompostu hosi PNTL, Servisu Nasionál Intelijensia – SNI no Falintil Forsa Defeza Timor-Leste – F-FDTL konsege rekoilla kilat boot tolu, pistola ida, rama automatika ho munisões bá kilat J3, M16 no pistola glock19.
“Iha Buska ne’e konsege rekolla kilat boot tolu, pistola ida, rama automatika ho munisões bá kilat J3, M16 no pistola glock19”, SMI sita publikasaun Hatutan.com, Segunda, (16/01).
Autór ne’ebé deskonfia subar kilat, Longuinhos Monteiro, ba Lusa katak nia rasik laiha koñesimentu bainhira autoridade seguransa ba halo buska iha ninia rezidénsia no laiha karta autorizasaun ka karta buska ruma.
Maibe, Longuinhos rasik entrega an diretamente ba parte seguransa hanesan Polícia Cientifica Investigação Criminál (PCIC) relasiona ho kazu subar kilat iha ninia rezidénsia.
Kilat hirak ne’ebé parte ekipa konjunta rekoilla asegura ona iha parte kompetente hodi kontinua submete ba prosesu investigasaun tuir mai.
Longuinhos Monteiro, okupa kargu importante sira mak hanesan eis Ministru Interior, Preokurador Jerál da Repúblika, inklui dadaun ne’e hanesan asesór prinsipál ba asuntu seguransa no defeza iha gabinete Prezidente Repúblika, José Ramos Horta. (Editór, Caleri).
