Dili-SMI: Xefe Estadu, José Ramos Horta ho Primeiru Ministru, Taur Matan Ruak – TMR halo diskusaun kona-ba preparasaun ba markasaun kalendariu Eleisau Parlamentar – ElPar tinan ida-ne’e nian.
Kona-ba kalendáriu eleisaun parlamentar nian, parte Governu sei kumpri desizaun hosi Prezidente Repúblika nian.
“Husi parte governu nian, ha’u garante ba Sua-Exselénsia Prezidente-da-Repúblika katak, desizaun saida mak Sua-Exeselénsia Prezidente foti, governu prontu par organiza no garante katak, eleisaun ne’ebé mai sei la’o di’ak.
“Hanesan eleisaun baibain ita halo, tanba ne’e momentu ida importante loos, tanba ne’e iha ita-nia rain, ita konsidera hanesan festa demokrasia”, esplika, Xefe Governu, Taur Matan Ruak.
Governu rasik sei halo esforsu hot-hotu hodi garante prosesu implementasaun elisaun jerál ho susesu no transparansia.
Relasaun ho data fiksu ba eleisaun jeral nian sei deside hosi Prezidente Repúblika rasik wainhira halo ona konsutasaun ho parte relevante sira.
“Ita hein, data saida mak sua eselénsia sei hili no ita haree to’ok, agora ha’u labele espekula, ha’u-nia garantia ba sua eselénsia Prezidente, governu sei halo buat hotu-hotu par eleisaun ne’e bele la’o”, Taur, tenik.
Markasaun kalendáriu eleisaun parlamentár ne’e, kompeténsia prerrogativa Prezidente Repúblika nian, hafoin rona governu, partidu polítiku ne’ebé iha assentu parlamentar no entidade seluk. (Editór, Rui Santos).
