Same-SMI: Polísia Tránzitu Manufahi prende motorizada hamutuk unidade 30 durante hala’o atividade pasa-revista ba movimentu transporte públiku iha área suku Babulu no suku Letefoho, Postu Administrativu Same Villa, Munisípiu Manufahi.
“Ekipa konjunta halo auto-stop iha fatin rua mak hanesan iha Suku Letefoho ita prende motór hamutuk 17 no iha Suku Babulu ita prende motór hamutuk 13, nune’e totál hamutuk motór 30 maka viola kódigu estrada no daudaun ne’e ekipa kontinua prosesu tuir lei kódigu estrada nian”, dehan, Komandante PNTL munisípiu Manufahi, Superintendente, Joni Viana das Regras, foin lalais ne’e.
Atividade pasa-revista ka “auto stop” ne’e atu bele kontrola no regularize rodoviária ba movimentu transporte públiku ne’ebé halo sirkulasaun lor-loron hosi suku ba postu no munisípiu nian.
“Haree ba asidente trafegu ne’ebé komesa a'as, ita orienta Xefi Seksaun Tránzitu hamutuk ho nia membru hala’o operasaun rutina liuhosi pasa revista hodi regulariza seguransa rodoviária no kontrola sasán kontra bandu sira seluk”, dehan, Komandante, Joni Viana.
Hosi totál motorizada ne’ebé ekipa tranzitu PNTL munisípiu Manufahi prende ne’e maioria laiha karta kondusaun, dokumentu invalidu nomós kontra regra rodoviária.
Atividade pasa-revista ne’e kompostu hosi Seksaun Tránzitu hetan apoiu hosi Seksaun Operasaun, Reserva Intervensaun Rápidu no Servisu Informasaun Polísia (SIP) Munisípiu Manufahi nian. (Editór, Guido Santos)
