Díli-SMI: Xefe Estadu Timor-Leste, José Ramos Horta, promulga ona Dekretu Lei númeru I/2023, 25 Janeiru 2023 kona-ba regara ezekuzasaun Orsamentu Jerál Estadu – OJE 2023 ho montante hamutuk billaun $1,8 nian.
“Prezidente Repúblika, Dr. José Ramos-Horta promulga ona Dekretu Lei númeru 1/2023, 25 Janeiru kona-ba Ezekusaun Orsamentu Jerál Estadu (OJE) tinan 2023.
“Diploma ne’ebé aprezenta husi Ministru Finansas Rui Gomes ba iha Konsellu Ministrus iha 11 Janeiru liubá ne’e, nia objetivu mak atu estabelese regras kona-ba ezekusaun orsamentál hodi fasilita ezekusaun OJE 2023”, dehan, Ministru Rui Gomes, ne’ebé sita iha pajina Ministériu Finansa, Kuarta, (25/01).
Dekretu Lei ne’e rasik Governu introduz sistema pagamentu liu-hosi plataforma online ne’ebé sei aplika ba membru órgaun soberania, eis titulares no pagamentu bens servisus nian.
“Iha Diploma ne’e, Oitavu Governu Konstitusionál introdus ba dahuluk uzu Kartaun Débitu no Kartaun Kréditu ne’ebé Titulares no Membrus Órgaun Soberania, Titulares Órgaun Diresaun no Titulares Kargu Diresaun bele uza hodi halo pagamentu bens no servisus liuhusi plataforma online”, dehan, Ministru, Rui Augusto Gomes.
Liu-hosi Dekretu ne’e mós VIII Governu Konstitusionál mós introduz ba dahuluk programa pílotu Dezentralizasaun Funsaun Pagamentu Tezouru (Back Office) 100% ba iha Liñas Ministeriais selesionadu hamutuk sanulu-resin-tolu (13).
Nune’e mós ba Prezidénsia da Repúblika, Parlamentu Nasionál, Primeiru-Ministru, Ministériu Finansas, Ministériu Negósius Estranjeirus no Kooperasaun - MNEK no seluk tan.
Iha loron 5 fulan-janeiru, Ministru Rui Gomes mós halo ona abertura ofisiál ba sistema Government Resource Planning (GRP) ka Free Balance hodi marka inísiu ezekusaun OJE 2023.
Simbolikamente Entrega Pakote OJE 2023 ba representantes Gabinete Prezidénsia da Repúblika, Gabinete Prezidente Parlamentu Nasionál, Gabinete Primeiru-Ministru, Gabinete Prezidente Tribunál Rekursus nomós ba Liñas Ministeriais.
Entidade sira Estadu selesionadu hirak ne’e hetan autonomia kompletu hodi ezekuta rasik sira-nia orsamentu hahú husi inísiu to’o realizasaun pagamentu bens no servisus.
Dezde 2017, Sestu Governu Konstitusionál hahú desentraliza Funsaun Pagamentu Tezouru 100% ba iha Ajénsias Autonomas no Autoridades Munisipais. Enkuantu ba Liñas Ministeriais 75%.
Ho Polítika Reforma Fiskál no Jestaun Finanseira Públikas ne’ebé mak introduz ona dezde tinan 2015 hosi Kintu Governu Konstitusionál no haree ba ninia importansia, Oitavu Governu Konstitusionál komprometidu atu kontinua implementa. (Editór, Rui Santos).
