Díli-SMI: Ministru ba Asuntu Parlamentar no Komunikasaun Sosiál – MAPKOMS, Francisco Martins da Costa Jerónimo, husu Governu Portugal atu kontinua fó apoiu formasaun língua portugueza ba jornalista Rádiu Televizaun Timor Leste – RTTL hodi nune’e bele promove lian portuguez iha RTTL.
“Husu kontinua fó apoiu formasaun ba jornalista sira iha RTTL tanba tuir dekretu Lei no estatutu RTTL tenke promove lian ofisial Tetum, ho portugés”, dehan, Ministru, Francisco Jerónimo, wainhira simu vizita kortezia Embasadora Portugal foun ba Timor-Leste, Manuela Freita Bairos, foin lalais ne’e iha Díli.
Relasiona ho pedidu koperasaun kontinuasaun ba formasaun lian portugeza ba jornalista RTTL iha futuru, MAPKOMS rasik planeia ona atu hala’o vizita traballu ba Portugal hodi ko’alia di’ak liu-tan kona-ba asuntu refere.
“(Ami) informa mós ba embaisadora kona-ba planu vizita MAPKOMS nian ba iha Portugal hodi hala’o kooperasaun nebe’e di’ak liután iha futuru oin mai”, SMI sita hosi komunikadu.
Sorumutu entre MAPKOMS ho reprezentante Governu Repúblika Portugal iha TL ne’e ko’alia kona-ba koperasaun sira iha área komunikasaun sosiál nian.
Liu-liu área koperasaun sira ne’ebé durante ne’e la’o ona hanesan formasaun ba jornalista timorense sira iha área língua nian.
“Hanesan kontinuasaunSoru-mutu bele lao tanba hanesan embaisadora foun mai hodi ko’alia kona ba kooperasaun ne'ebé lao tia ona ho mapkoms, liu husi fó formasaun ba jornalista Timor oan sira hodi hasae sira nia kapasidade iha lingua Portuguesa, no durante nee rezultadu kooperasaun la'o ho di’ak i kontinua lao nafatin”, tenik Jerónimo iha komunikadu ne’e.
Embaixadóra, Manuela Freitas Bairos, hatete, kooperasaun entre nasaun rua iha área komunikasaun sosiál ne’e sei kontinua nafatin tuir komitmentu entre nasaun rua nian. (Editór, Guido Santos).
