Baucau-SMI: Governu liu-hosi Ministériu Edukasaun, Juventude no Disportu – MEJD sei finaliza kostrusaun foun ba eskola sira iha munisípiu Baucau no munisípiu seluk iha teritóriu hamutuk 214, tinan ida-ne’e.
Foin lalais ne’e, Governu halo ona inagurasaun ba konstrusaun no rehabilitasaun besik atus ida iha parte munisípiu Baucau nian.
“Primeiru Ministru Taur Matan Ruak inagura Eskola 94 a nivél nasionál ba faze dahuluk ne’ebé simboliza iha Eskola Bázika Filial Daitual.
“Serimónia Inagurasaun ba Konstrusaun no Rehabilitasaun ba Eskola unidade 94 a nível nasionál ba faze dahuluk nian ne'ebé simboliza iha Eskola Bázika Filial Daitula Maucale, Suku Gariuai, Postu Administrativu Baukau Villa, Munísipiu Baukau”, SMI sita Komunikadu hosi Gabinete Primeiru Ministru, Taur Matan Ruak, foin lalais ne’e.
Inagurasaun eskola hamutuk 94 ne’e hanesan faze inísiu ba tinan 2023 no sei kontinua faze segundu to’o finaliza rehabilitasaun no konstrusaun ba eskola sira ne’ebé tama ona planu Governu nian.
Hosi totál eskola hamutuk 94 ne’ebé Governu inagura iha faze dahuluk ne'e eskola hamutuk 89 mak halo konstrusaun foun no restu halo de’it rehabilitasaun.
“Eskola 94 ne'e ba faze dahuluk ne'e, 5 mak rehabilitasaun no 89 nu'udar konstrusaun foun. Ba Baukau rasik hamutuk Eskola 17”, tenik, komunikadu.
Tuir planu Governu sei inagura tan eskola hamutuk 120 ne’ebé iha ona faze ka prosesu rehabilitasaun no konstrusaun.
“Iha fulan-marsu mai, sei inaugura tan faze daruak nian hamutuk eskola 120, ho total salas 360”, sita hosi komunikadu.
Ho inagurasaun faze segundu ne’e Governu konsege rehabilita no halo konstrusaun foun ba eskola sira ho totál 214 ne’ebé bele kontribui ona dezenvolvimentu edukasaun iha rai-laran. (Editór, Rui Santos).
